Ïa shim bynta da ki spah ngut ki longkmie ha ka rally ban pyrshah ïa ka Kyiad bad u Droks ha Mawkyrwat

Mawkyrwat, ‘Nailar, 23: Da ki spah ngut ki longkmie kiba don hapoh jong ki Self Help Groups (SHGs) ba kynthup ïa ka Tehsonglang Cluster Level Federation (CLF), Lawei Bankyrshan CLF, Tylli Kawei CLF kiba na Mawlangwir, Jakrem bad Mawkyrwat mynta ka sngi ki la ïamih paidbah ha ka jingïa-ïaid paidbah ryngkat ka jingpyrta ïa ki jingthoh kiba don ha ki placard kaba la sdang naduh phyllaw jong ka ophis Block Development Office, Mawkyrwat haduh ïew Mawkyrwat ha kaba la pynwai artad da ka jingïalang paidbah.
Ïa kane ka ‘Rally-cum-Awareness Programme’ la pynlong da ka ophis jong u Block Development Officer (BDO), South West Khasi Hills District lyngba ka Block Mission Management Unit (BMMU), NRLM, Mawkyrwat C&RD Block, Kudumbashree NRO ha kaba u bah L.T. Tariang uba long u Additional Deputy Commissioner jong ka South West Khasi Hills District u long kum u kongsan.
Ha ka jingkren u bah L.T. Tariang, Additional Deputy Commissioner, South West Khasi Hills District u la ai ka jingïaroh ïa ki longkmie kiba shim khia bad kiba don ka jingkitkhlieh na ka bynta ban rat dyngkhong ïa une u jingdih ba sniew da kaba ban ba ki kynthei ki don ka bynta kaba khraw na ka bynta ban ai ka jingkyrshan ïa kito kiba la ngop bad ban pynkylla ïa ka jingim jongki. Ha kajuh ka por u la pynshlur bad ai mynsiem ban ïaid shakhmat bad ban pynurlong ïa ki jingthmu jong ki da kaba pynkhlaiñ ïa ki longïing longsem lyngba ka jingïatreilang bad ka jingsngewthuh jingmut hapdeng shi kurim da kaba khmih lynti ba dei lyngba ka jingkhlaiñ jong ki longïing longsem lah ban rat dyngkhong bad pynduh jaid ïa une u jingsniew uba la ktah ïa ka shongsuk shongsaiñ ha ka imlang sahlang namar ka jingkhlaiñ jong kano kano ka jaidbynriew ka shong eh ha ka jingkhlaiñ jong ka longïing longsem.
Haba kren ha ka jingïalang ka kong Bristina Wanniang, Supervisor, District Social Welfare Office, South West Khasi Hills District ka la ïathuh ba ka Social Welfare ki don ki skhim na ka bynta ban pynlong ïa ki awareness programme ha kaba ïadei bad u droks gad ka jingdih kyiad. Shuh shuh ka la ong ba ka jingkyrni ha ka jingdih buaid kum ïa ka kyiad bad ki droks ka wanrah bun ki jingsniew ym tang ïa u briew shimet hynrei ka pyndik ïa ka longïing longsem, ki marjan marpa, ïa ka imlang sahlang bad ka ktah ïa ka ri hi baroh kawei. Ka la batai ruh ba ki droks ki dei ki dawai bad lada ki pyndonkam bakla ki lah ban ktah bad pyntroiñ ïa ka met ka phad bad ïa ki jingmut jingpyrkhat bad ka ïalam shaduh u pud ka jingmynsaw.
Shuh shuh ka la ïathuh ba ka sorkar India ka don ki skhim ha ka ban ïaleh pyrshah ïa u droks lyngba ki prokram bapher bapher kum ka Integrated Programme na ka bynta ka Alcoholicm bad Drug Abuse, ka National Action Plan, Joint Action Plan kaba peit ïa ki khynnah kiba rit ka rta ha kaba yn ym shah ban die ïa ka kyiad bad ka ‘Meghalaya Drug Abuse Prevention Policy 2020’ ha kaba jan baroh ki department ki don la ka bynta ban trei na ka bynta ban ïaleh pyrshah ïa ka jingdih bad ka jingpynïaid ïew ïa kine ki jingdih pynbuaid.
Namarkata, ka la sneng la kyntu bad wer ïa ki kmie ki kpa ban sneng ban pyni ïa la ki jong ki khun halor ka jingsniew jong ki droks da kaba kyrpad ïa baroh ban ai ka jingïatreilang ha la ka jong ka bynta ha ka ban rat dyngkhong ïa kiba kum kine ki jingsniew khnang ba kin ym ïoh ban suh thied ha kane ka ri jong ngi bad ha ka juh ka por ka la kyrpad ïa ka Village Communities bad ïa kiwei kiwei ruh ban shim lem ka bynta ha ka ban iarap ia kito kiba la ngop ha kiba kum kine ki jingdih pynbuaid da kaba ai jingsyllok bad ka jingsumar ha ka por kaba biang bad ban pyntip wut wut sha ki bor jong ka aiñ lada ki lap lane don jingsuba ïa kino kino kiba don kti ha kaba pynïaid ïew ïa ki droks bad ha kajuh ka por ka khot ïa ka jingïasnohkti lang jong baroh na ka bynta ban ïaleh ban pynduh jaid ïa une u jingsniew uba bam duh ïa ka ïoh ka kot, uba pynduh thiah pynduh dem bad uba long ka daw jong ka jinghiar ha ka longbriew manbriew.
Ka kong Alcy Lyngkhoi, Psychiatrist, District Mental Health Department ka la ong ba ka jingjyllei bad jingkyrni jong ka jingdih droks ka la ktah shibun ïa ka jylla bad ka pynduh jingkyrmen ïa ki khynnah samla kiba long ka lawei jong ka jaidbynriew da kaba kyntu ïa ki samla ban kiar na kiba kum kine ki jingdih pynbuaid kum u sikret, biri, duma, kyiad bad drugs kiba ktah ym tang ïa u nongdih shimet hynrei ïa ka ïing ka sem, ka imlang sahlang bad ïa ka ïoh ka kot ha ka jylla. Ka la ban jur shuh shuh ba kine ki jingdih ba sniew kum ki depressants, stimulants, hallucinogens, opioids kiba ktah ïa ka koit ka khiah ka jingmut jingpyrkhat bad kaba lah ban ïalam bakla ïa ka jingim u briew. Shuh shuh ka la ïathuh ba kiba bun na kiba pang bampong ki dei barobor kito kiba ju pyndonkam ïa kiba kum kitei ki jingdih pynbuaid ne kiba pyndonkam bakla ïa ki droks.
U S. Ahmed, Sub Inspector of Police u la wer ïa ki paidbah nongshong shnong ban don ka jingïatreilang bad ban ai jingkyrshan lem ïa ka Police Department na ka bynta ban weng ïa kine ki jingeh kiba ktah ïa ka imlang sahlang da kaba kyrpad ba lada ki don kino kino ki jingtip ne jingsuba ha kaba ïa dei bad ka jingpynïaid ïew ïa u droks bad kiwei kiwei pat ki huri hura ban pyntip mar mar ha une u No-112.