ïa kynduh ka JSU markhmat bad u MR ha Jowai, dawa ban buh BOP ha Zero line sha khappud

Jowai, Nohprah 03: Ka JSU sengkmie mynta ka sngi kala ïakynduh markhmat bad u Myntri Rangbah ka jylla ha Jowai ban buddien ïaki jingdawa kaba dang shu dep jia ha ka shnong Mukroh ha ki sngi ba lah dep. Na ka liang ka seng ka la dawa na ka sorkar halor ki san tylli ki mat na bynta ka jingïadei bad ka jingbuh BOP sorkar sha khappud.
Ka seng ka dawa na ka sorkar jylla ba kam dei ban buh BOP sha poh shnong poh thaw hynrei dei ban buh ha ka Zero line ha khap pud. Ka seng ka dawa na ka sorkar ban leh daka joint inspection lane ban kynthup lang bad ka JHADC bad ki nongïalam nongshong ka shnong Mukroh ban wad thuh bha ïa u pud u sam ban ïoh buh ïaka BOP ha Zero line na bynta ka jingïada ba paka ïa u nongshong shnong bad ban lait na jingshah knieh jaka bad shah pyndik ha u Assam.
La dawa ruh ban pynkup bor ïaki pulit ka jylla kiba shong pahara sha ki khapud ban pynphai kylla lada don kano kano ka jingsiat na ki pulit Assam kum shi bynta ban ïada ïa u paitbah ka thaiñ ka shnong khappud bad ban pynphai iaki 36 tylli ki shnong Khasi Jaiñtia na Block – sha Meghalaya.
Ka seng ka pyrshah jur ïaka jingthmu bad ka jingkren pynshit u CEM ka Karbi Anglong Autonomous Coucil badka jingthmu jong ki Karbi ban buh mot sah jingkynmaw ha u pud u sam ka shnong Mukroh ia u pulit Forest ka Assam u ba kyllon ïap ha Mukroh na kaba ïa siat para maki. Ka seng dawa na ka sorkar jylla ba kam dei ban ai lad ïaka jingthmu CEM ka KAAC da lei lei namar kane kan sa wanrah ïaka jingum snam lane ka jingsngew ïapher hapdeng ki jaitbynriew Hynñiewtrep bad ki Karbi.
Ha kane ka jingïakren bad ki dkhot ka seng na ka liang u CM u lah kular ban leh ïaka joint inspection bad ithuh ia u pud u sam ka shnong Mukroh bad ban ym ailad ban shna ïa u statue jong u pulit Forest guard ha Mukroh.