Ïa ka kaiphod bhah thungkam yn aiti ha ka 31 tarik mynta u bnai, ong u Chief Secretary

Shillong, Nailar 08: U Chief Secretary ka jylla u Bah DP Wahlang u la ong ba ka jingbishar ha kaba ïadei bad ki jingai jingmut ka Expert Committee halor ka bhah kam ha ka jylla ne ka State Job Reservation ka dang ïaid ha ka jingïakren mynta.
Ha kaba ïadei bad kane na ka liang jong u Bah Wahlang u la ong ba un sa aiti ïa ka kaiphod jong u ha ka jingïalang ka ban long ha ka 31 tarik mynta u bnai bad ïa kane ka kaiphod un sa aiti sha ka sorkar jylla.
“Nga la pule bad ïaid lyngba ïa kane ka jingai jingmut jong ka committee bad kane ka kam ka dang ïaid mynta kumba la bthah da ka kynhun Myntri ka sorkar jylla sha nga bad ïa kane ka kaiphod ngan sa aiti ha ka 31 tarik mynta u bnai,” pynthikna u CS.
Lah ban pynkynmaw ba ïa kane ka Committee la thaw hapoh ka jingïalam u Justice (Retd) MC Garg bad ïa kane ka Committee la thaw ha ka 12 tarik u Nailur, 2023, ha kaba kane ka kynthup ïa Justice (Retd) Dr Satish Chandra, Prof DV Kumar, Prof Chander Shekhar, bad Prof Subhadip Mukherjee.
Kane ka committee ka la dep ruh ban aiti ïa ka kaiphod hadien ba la dep ban bishar kam ha kaba ïadei bad ka jingbhah kam jong ka jylla.
Katkum ka reservation Policy jong ka snem 1972 ka la bhah 40% ïa ki kam sorkar na ka bynta ki Khasi-Jaiñtia bad 40% sha ki Garo bad 5% sha kiwei pat.
Lah ban ong ba ha u bnai Jylliew ka Khun Hynñiewtrep National Awakening Movement (KHNAM) ka la kyntu ïa ka sorkar ban sam ïa ka kaiphod jong ka expert committee kaba la shong ban bishar kam ha kaba ïadei bad ka state reservation policy bad ïa kane kaiphod dei ruh ban sam sha baroh ki seng saiñ pyrthei.
Ha kaba ka la ong ba kane kan ïarap ïa ki seng saiñ pyrthei ban pule bad ai jingmut ruh lada donkam.