Ïa bam smai ka kynhun ïalehkai ki pulit bad ki Nongthoh Khubor na Ri Bhoi ban rad dyngkhong ïa u Drok

Nongpoh, Nailur 09: Kawei na ka jingma kaba ap mynta ïa ka imlang ka sahlang kaba dei na ka jingkynrei jong u drok ba bun ki khun samla ki la ngop ha une u jingdih ba sniew, na ka liang ka kynhun ïalehkai ki Pulit na Ri Bhoi bad ki Nongthoh khubor ryngkat ki bor synshar District ki la shim lang ïa ka jingbam smai na ka bynta ban ïa khun pyrshah bad ban rad dyngkhong ïa u drok ha Ri Bhoi District.
Kane ka jingshim smai ki kynhun ïalehkai na ka bor synshar district bad ki kynhun Nongthoh Khubor ka dei ha ka jingpynlong ïa ka jingïakhun phutbol paralok mynta ka sngi ha madan Pahamsyiem Nongpoh.
La pynlong ruh ïa kane ka jingïakhun phubol paralok hadpeng ki kynhun ïalehkai pulit bad ki Nongthoh Khubor, ka dei shi bynta ban pynpaw sha ki paidbah ka Ri bhoi ban don lang kata ka jingïatrei lang na ka bynta ban rad dyngkhong ïa u drok uba la kynrei ym tang ha ki shnong ba long sor bad mynta u la pur ruh wat sha ki Shnong Nongkyndong.
Kum ka jingïatrei lang ban ïakhun pyrshah ïa u drok, la shim ïa ka jingbam smai naduh ka jingdon lang u ADC ka Ri Bhoi, u Bah M.B Tongper, u SP ka Ri Bhoi, u Giri Prasad bad u Nongïalam ki Nongthoh Khubor, u Bah Cornelius Laloo ryngkat ki kynnun, ha kaba ki la shim ïa ka jingsmai (Pledge) kaba long ka jingbam smai ban ïakhun na ka jingtah jong u drok.
Ka khubor na u ADC ka Ri Bhoi, u Bah M.B Tongper bad u SP ka Ri Bhoi, u Giri Prasad ki la kren sha ki paidbah ba kane ka long ka khubor ym tang ïa ki bor synshar District bad ki Nongthoh Khubor, hynrei ban pynduhjaid ïa u drok donkam ka jingïatrei lang na baroh ki liang naduh ki bor synshar shnong, ki nongïalam bad ki paidbah bad dei tang ka jingïatrei lang kaba lah ban pynduh jaid ïa une u drok uba la pynjot ïa bun ki samla ba lui lui ka district bad ka jylla hi baroh kawei.