Shillong, Rymphang 19: Ka kol ha ka khyllipmat shuwa ba la pynkhih da u Daniel Goncalves ka la pyllait im ïa ka Shillong Lajong FC na ka namrem ha ka jingïakhun I-League 2024-25 pyrshah ïa ka Dempo SC kaba la kut ha ka jingïakhaid da mar 2-2 ha Goa hynne ka sngi Balang.
Baroh ar tylli ki kol jong ka Lajong la thep da u Daniel Goncalves, bad da kane ka jingïakhaid, ka Shillong Lajong ka la ïoh mynta ban kamai 23 point naki 15 tylli ki jingïalehkai bad ïaineh ha ka kyrdan ba san ha ka miej, katba ka Dempo SC ka don ha ka kyrdan ba 9 da kaba khur 19 point naki 15 sien ïakhun.
Ka jingïalehkai ka la long kaba itynnat naba baroh arliang ki la ïakhun shitom ban ïoh khur pura ïa ki lai point. Dei ha ka 39 minit ba ka kynhun ba ïalehkai hala ïing (Dempo SC) ka la ïoh ban lamkhmat ïa ka jingïalehkai ha ka kylla step na ka kol ba la thep da u Marcus Joseph.
Hynrei khyndiat minit mar ïa bteng ka kylla miet u Daniel Goncalves u la jubab na bynta ka Shillong Lajong ban pynïakhaid ïa ka jingïalehkai ha ka 47 minit.
Hadien katto katne por ka Dempo ka la ïoh biang ban lamkhmat sa shisien lyngba u Mohamed Ali ha ka 52′ minit. Wat hadpeng ka jingduh jingkyrmen ka Lajong ka la ïakhun doh ïap bad dei ha ka minit pynjlan jong ka por ba u Daniel Goncalves (90’+7) u la ïoh ban pynkhih ïa ka kol kaba ar na bynta ka kynhun bad ïalade.
Ka Lajong kan mih na Goa ban leit sha Bangalore ha kaba kan aireng pyrshah ïa ka kynhun ba wan kyrdan ba 10, ka SC Bengaluru ha ka 26 tarik Rymphang.
