Shillong, Kyllalyngkot 10: Ka Shillong Lajong FC ka la wanphai da ka jingjop ban khur pura ïa ki 3 poiñ hadien ba jop salit da 1-0 kol ïa ka Real Kashmir FC ha ka lympung I-League 2024-25 kaba la long hala ïing- ha madan First Ground-SSA Stadium, Polo, ha ka janmiet sngi Thohdieng.
Katei ka shi kol la pynkhih da u Aman Ahlawat ha ka 34 minit jong ka kylla step. Kane ka dei ka kol kaba nyngkong ïa une u rangapdien ha ka I-League ha ki ar tylli ki jingïalehkai ba u la mih madan.
Lah ban kdew ba kane ka dei ka jingïalehkai kaba nyngkong ïa ka Lajong mynta u snem thymmai. Hadien ba ka kynhun ka la mad ïa ka namrem ha ka jingïalehkai ba khadduh pyrshah ïa ka Delhi FC da 3-1 kol shabar nala ïing, na ka liang jong u Jose Carlos Rodriguez Hevia – coach ka Shillong Lajong, u la pynkylla katto katne ïa ka kynhun kaba la treikam ban pynïoh ïa ka kynhun ban khur pura ïa ki 3 point kiba kongsan ban kiew kham shakhmat ha ka miej.
Kane ka namjop ka dei kaba ar na bynta ka Lajong mynta ka samoi kaba la kyntiew 9 poiñ bad rah ïa ka kynhun sha ka kyrdan ba hynñiew; ka la ïakhaid ruh lai sien bad rem ar sien naki 7 sien ïalehkai. Shuwa kane, ka SLFC ka don ha ka kyrdan ba 10.
Ka Real Kashmir ka la dei ban poi sha ka kyrdan ba lai lada ka jop, hynrei, naba shah rem ka dang ïaineh da 9 poiñ bad hiar sha ka kyrdan ba 9.
Ka Lajong kan pynkhreh biang ïa ka jingïakhun pyrshah ïa ka SC Bengaluru ha ka 13 tarik Kyllalyngkot, ha ka jingïalehkai ban long hala ïing ha ka por 4 shiteng nohphai sngi, ha SSA Stadium.
