(Tesar Marweiñ)
Nongstoiñ, Naiwieng 15: Ka shnong Mawdoh kaba jngai kumba 13 kilomitar na Rambrai ka dei ka shnong kaba la heh bha, ka dei ruh ka shnong kaba ki briew ki dei kiba trei shitom bad kiba im da ka rep ka riang, ka thaiñ khoh, shang, shylliah bad kiwei kiwei.
Ha ki snem ba la leit noh da ki hajar tylli ki shylliah ba thaiñ da ki siej bad ki thri kiba la shalan kylleng ki jaka haduh sor Shillong ki dei ki shylliah kiba la thaiñ da ki nong Mawdoh.
U nongthoh khubor haba hiar sha katei ka shnong ban peit ïa ka jinglong jingman ki nongshong shnong, la ïoh ban ïakren bad u parad Spershon Lyngoh Mawdoh u ba dei ruh u Lyngdoh jong ka shnong, ha kaba u la ong ba mynshuwa shaphang shathie na jong ka shnong mar shilliang bad ka ïingmane jong ka balang Presbyterian Mawdoh ka don ka ‘law Lyngdoh.
U la ong ruh ba ki dieng ha katei ka khlaw ki long kiba heh haduh katta katta bad ki briew kim ju nud ban leit rung klumar ha katei ka khlaw. U la pynkynmaw ruh ba ha ki por ba ïa ka Rambrai Presbytery ym pat phiah bad ka dang kynthup lang ïa ki lai tylli ki Presbytery ka Umsaw, Rambrai bad Tynghor ha shuwa ba ka jingïaseng kan long ha Mawdoh, la ju pynbna ha baroh ki balang ba lada ki wan jingïaseng kim bit ban leit kai ha katei ka khlaw, namar lada ki leit bad ki kum kheit ïa ki sla dieng ne don kino kino ki syntiew ba ki kum kheit, ki ryngkew ki basa kiba shong ha katei ka khlaw, ki ju pynshitom da kaba khyrwait pynkynriang ïa ka ryndang haduh ba ka khmat ka phai shadien.
Utei u parad u la ong ba lada shah pynshitom kumta, ki don ki nongkhan, nongkñia kiba lah ban pynkoit, da kaba ki leit nguh leit dem ryngkat ka kñia ka khriam, ha kawei ka jaka hapdeng jong katei ka khlaw kaba don ka tyllong um ha khap mawsiang bad ynda ki la leit kñia hangta kiba shah pynshitom ha uta u basa ki koit noh.
Nalor kata u la ong ruh ba ha u sem 1993-94 ba na ka jingrhah spah jong ki briew ki thom da ka bor bad ki pom na phang ïa katei ka khlaw haduh ba ka la synlen lut khait. Ha kine ki sngi pat ha katei ka jaka ba don ka ‘law Lyngdoh la dap da ki ïing briew suda.
Utei u parad u la ong ruh ba ha ki snem ba mynshuwa ka shnong Mawdoh ka dei tang kawei ka shnong, hynrei katba nang mih ki sngi ka shnong ka la nang ïar bad ka jingbun briew ka la nang kiew. Kumta la pynkha noh haduh hynñiew tylli ki kyntoit shnong bad ki la don la I jong u jong u rangbah shnong.
Kitei ki kyntoit shnong ba thymmai kiba la pynkha na ki long ka Mawkyrngah, Mawdohpdeng shnong, Mawlangstieh, Sawtalad, Mawbuhtraw, Mawroh bad ka Mawrimïing. Ha kajuh ka por u la ong ba haduh mynta ha ki la don ha palat sawspah tylli ki longïing ha baroh hynñiew tylli ki kyntoit.