Husiar para ri, ka jingkren u hehduh ka RSS ka dei kaba don jingthmu sniew sha lyndet: Ardent

Shillong, Nailur 27: U Bah Ardent Miller Basaïawmoit, President jong ka Voice of the People Party (VPP) u la ong ba ka jingong jong u hehduh ki RSS, u Mohan Bhagwat ba baroh ngi dei ki Hindu namar ba ki shong ki sah ha kata ka Bharat, kadei ka jingkren kaba don bad ka jingthmu sniew kaba na shapoh.
Ha ka jingpyllait khubor mynta ka sngi, u Bah Ardent, u la ong ba ki paidbah kidei ban da pule bad puson bha ïa kane ka jingkren ka thew shano. “Lada ngi la pule bad pynshong nongrim bha, kane ka thew beit ïa ki Khristan”, u la ong.
U hehduh ka VPP, u la ong ba kaba nyngkong, u kwah ban ong ba u Bhagwat u thmu ban ong ba ki trai ri trai muluk jong kane ka jylla kidei mynshuwa ki Hindu kiba hadien ki la shah pynkylla noh sha ka Niam Khristan. Kaba ar pat, u kwah ban wanrah ïa ka jingïapait hapdeng ki jaidbynriew trai ri jong kane ka jylla lyngba ka jingkren jong u. Kaba lai pat u pyrshang ban pynngiet ïa ki trai ri trai muluk ba ka niam tynrai jong ki kam don jingïapher eiei bad ka niam Hindu.
“Kumta ngim lah ban shim sting na kane ka jingkren jong u. Ka long kaba donkam namarkata ïa ki para ri ban long kiba husiar bad kiba peitngor bha bad ban nym shah ïalam bakla ïa kane ka jingkren ba khlem nongrim bad bym shongnia da une u nongïalam ki RSS”, la ong u Bah Ardent.
Shuh shuh, ha kane ka kyrwoh, u Bah Ardent u ong ba, ka long kaba dei ban kynmaw ba shuwa ka jingwan ka niam Khristan, ki trai ri trai muluk ki la don la ka jong ka jingngeit bad ka iam ka rukom kaba iapher bak ly bak na ka rukom ngeit bad rukom hikai ka niam Hindu. Ki trai ri ki mane ïa U Blei ba im ym ïa ki blei thaw. Kumta ym lah ban pynïasyriem ïa ka jingngeit ka niam Khasi bad ka jingngeit ka niam Hindu wat tang khyndiat ruh.
U la ong ruh ba kum u Khristan, um ju kam mynno mynno ruh ba Meghalaya kadei ka jylla Khristan, namar ba ka jingngeit bad ka niam kadei kam jong u briew shimet bad kam don jingïasnoh bad kano kano ka jaidbynriew ne ka ri. Ka long ruh kaba beaiñ ban kam ba ka Meghalaya kadei ka jylla Khristan lane ban ong ba ka India kadei ka ri ki Hindu. “Namarkata to ngin ïeng pyrshah ïa kano kano ka jingthmu ban wanrah ka jingïapait ïapra ha ka kyrteng jong ka Niam. To ngin nym ïapeit iwei ïa iwei da ka jingsngew niam, hynrei ban ban ïaleh tyngeh ban pynneh pynsah ïa ka jingïalong kawei jong ka jaidbynriew bad ka ri”, la pynkut ka kyrwoh na u President ka VPP.