Shillong Naitung 6: U Nongïalam ka Liang Pyrshah ka ïing dorbar thawaiñ ka jylla bah Ronnie V Lyngdoh, uba long ruh u Nongïalam ka seng Congress, ula ong ba ki paidbah ka Thaiñ Shatei Lammihngi ki dei ban husiar bha ïa ka seng BJP, namar tang ba kan don haka bor bad ban jop ïa ka elekshon, kane ka party ka la pyrshang ban wanrah ïa ka jingïapher niam bad jingïapher jaitbynriew.
“Ngi ki jylla ha thaiñ shatei lammihngi, ngi dei ban husiar namar ba haba peit mynta ha Manipur kam don ei ei ka jingmyntoi ïa ki nongshong shnong hynrei tang ka jingduh suda, ka jingiap, ka jingsngewsih bad ka jingiam briew hynrei imat ka sorkar NDA kaba ïalam da ka BJP ban ïoh shong ha ka bor kam salia ba wat para nongshong shnong ngin ïapyniap, ïathang ïa ki ïingmane, pynjulor ïa ki ïing ki sem bad ki paidbah ki dei ban husiar na kum kine ki seng saiñ pyrthei”, ong u Bah Ronnie Lyngdoh.
Ula kynnoh ruh ba ka jingleh jong ka seng BJP kadei tang ka buit politik.
U Bah Ronnie ula ong, ba ka jingjia ha ka jylla Manipur ka la sakhi ïa kane ha kaba ka jingïakynad ka la ïaid haduh lai bnai mynta bad ka la wanrah ka jingduh bun ki mynsiem briew bad ki jingjulor hynrei u Myntri Rangbah duh ka ri Narendra Modi um shym la don por ban leit sha Manipur tang shi sngi ruh.
“La lai bnai tam ki nongshong shnong ka Manipur ki la ïakynduh ïa ki jingeh bapher bapher na ka jingïakhih bad jingïakynad hynrei u Myntri Rangbah duh ka ri um don por ban leit sha Manipur tang shi sngi ar sngi ban kyrpad ïa ki paidbah ban pynneh ïa ka shongsuk shongsaiñ ha katei ka jylla,” ong u Nongïalam ka Liang Pyrshah.
Kane hi ka pynpaw ba ka BJP kam salia ei ei wat lada ïa iap bad ïa umsnam ruh namar ka sngewthuh ba ha Manipur ki Meitei ki bun ki seat MLA ban ïa ki Kuki bad kiwei kiwei ki riewlum kumta tang ba kan don haka bor ym lei lei lada jia haduh katne ha Manipur ruh. Namar ki Meitei ki don 40 seat bad ki Kuki bad kiwei ki party ki don tang 20 seat na kata ka daw ka BJP ka sngap beit jar jar haduh mynta namar ka sngewthuh ba kan don beit ha ka bor, ong u bah Ronie.
