Shillong, Nailar 1 : Ka la jia ha kylleng ka sor Shillong ba kiba bun ngut ki briew ki la shah shet namar ka la don ka kynhun kaba ïaid kylleng kylleng kaba leh mynleh ban pan phone ba ki donkam kyrkieh eh ban kren sha kiba haïing ne ki paralok hynrei tang shu ai ki phet bak. Lada dei para ba dang ïakhlaiñ ban ïabeh te la ïoh biang ka phone lada dei kiba la tymmen ne ki kynthei te la shu duh ei. Kine ki jingjia ki la jia ha kiba bun ki jaka.
Ym tang ba ki pan phone hynrei teng teng lada phi kren phone ha ka por ba ïaid lynti ki wan nadien bad knieh bak ïa ka phone bad phet ruh. Dang ha ka sngi Saitjaiñ ha ka por 2.20 janmiet arngut ki briew kiba shong da ka thuk thuk ki la knieh ïa ka phone Redmi na i kong Jennyta Swer katba i dang ïaid lynti na Law U Sib sha Madanrting.
Ha kaba nyngkong ki la pynsangeh ia ka thuk thuk bad pan phone ban kren phone hynrei haba im ai ki la knieh bad phet bak. Mar mar i la pyntip sha ki pulit bad ki pulit ka Madanrting ki la rejister case ha ka kyndon 96(7) 22 u/s 392 IPC.
Ha ka janmiet Sngi U Blei ha ka por 5.25 pm ki pulit ki la ïoh kem ïa kitei ki arngut na Mawblei. Kine ki dei u Othaniel Marbaniang 19 snem na Nongthymmai Rngi Neng bad u Govind Singh 20 snem na Demthring Block I. ïa ka thuk thuk ba dang thymmai ka Yamaha la kurup da ki pulit bad kumjuh ruh ïa ka phone ba ki knieh na i kong Jennyta ruh la ïoh biang na ki . Ki pulit ki dang pynlong ka jingtohkit bniah ïa kine ki arngut.
