Khliehriat, Naiwieng, 05: Namar ka jingsniew shaba palat jong ka surokbah National Highway-6 ha ka thaiñ Narpuh, East Jaiñtia Hills District khamtam ki jingkieng, u Deputy Commissioner jong ka East Jaiñtia Hills District u Shvansh Awasthi uba dei ruh ha kajuh ka por u Chairman jong ka District Disaster Management Authority (DDMA) u la kyntu ïa ki paidbah nongleit nongwan, kynthup ïa ki nongñiah kali, ki paidbah kiba ïaid kjat ba ki dei ban long kiba phikir haba ñiah kali ne haba ïaid na ka surokbah National Highway khamtam ha ki bynta ba don ki jingkieng, kata naduh Sonapur shaduh Malidor.
Katba ka National Highway Authority of India (NHAI) kam pat dep ban maramot bha ïa ki jingjulor, u Deputy Commissioner u la kyntu ïa ki paidbah bad ïa ki nongñiah kali ba ki dei ban bud bad ban kohnguh ïa ki aiñ ñiah pynïaid kali kumba la bthah ha ki jaka ba don ki jingkieng kiba buh jingma khnang ban lait na kino kino ki jingjia ba sngewsih.
U DC ula phah ruh da ka shithi sha u Project Director jong ka National Highway Authority of India (NHAI) ha ka Lah Sngi u Blei da kaba bthah ba kan maramot noh mardor ïa ki jaka kiba la julor palat ha ki jingkieng kiba don ha ka surok NH-6 ha Narpuh, kata naduh Sonapyrdi terter shaduh Malidor kynthup ruh ka nala tuid um kaba ha Wahkoh, Umkiang.
Ha ka shithi, u Deputy Commissioner u la pynpaw ba ki bor synshar district ki la ïoh jingtip ruh ba ka nala pyntuid um kaba don ha Wahkoh, Umkiang bad baroh ki jingkieng kiba don ha surokbah National Highway-6 ha Narpuh ki la julor bad buh jingma ïa kiba leit ba wan.
Khnang ban ïada ïa ki nongleit nongwan bad ïa ki paidbah ban lait na kano kano ka jingjia ba sngewsih bad ban ïada ruh na ka jingjulor ki kali ki bor synshar district ki la bthah ïa ka NHAI ban buh dak (Night Visibility and Warning Signs) ha ki jaka ba don ki jingkieng bad ki nala tuid um kiba la julor khnang ban ïada ïa kito kiba ñiah kali ha ka por mynmiet ban lait na kano kano ka jingjia ba sngewsih.
La bthah ruh ïa ka NHAI ban pynpoi mardor ïa ki kaiphod sha ophis u DC ka East Jaiñtia Hills District.
Ki jingbthah jong u Deputy Commissioner ki long ruh katkum ki kyndon ba la kdew ha ka Section 34 (m) jong ka Disaster Management Act 2005 bad ong ba kane ka long ka kam kaba hakhmat eh bad kaba la donkam ban leh noh mardor.
