Hun u Myntri ïa ka jingïaid beit ka jingpyntrei ïa ka Projek New Shillong Water Supply Scheme

Shillong, Rymphang 4: U Myntri ka tnat PHE Marcuise N Marak u la pynpaw ka jingsngewhun ban ïohi da la ki jong ki khmat ha ka jingleit jurip ïa ka New Shillong Water Supply Scheme ba ka kam ka la ïaid shaid shaid shakhmat.
“Nga sngewkmen shibun ban pynpaw ba ka kam ka ïaid bha bad nga kyrmen ba ïa kane ka project yn lah ban pyndep hapoh ka por ba la buh. Ka jingpyndep ïa ki jingtrei Civil Work ka long haduh 30 percent bad ka jingthied ïa ki pipe, ki pump, ki mashin bad kiwei kiwei ki tiar kala kot haduh 90 percent,” ong u Marcuise.
Ka projek ka la mad ïa ka jingslem ban sdang namar ki jingeh ban ïoh jaka hynrei mynta la lah ban pynbeit ïa kane ka kam.
La khmih lynti ba ka jingtei ïa ka jaka pyllang um (am) yn sdang hapoh ki 10 sngi ban wan namar ka jingtei ïa ka nongrim jong ka Dam kala jan dep.
“Ka la don ka jingpynslem khyndiat namar ki jingeh ban ïoh jaka, kumta ki Ophisar ki la leit ïakren bad ki trai jaka kaba la shim por la jan shisnem bad ka la don ka jingeh ban ïoh jaka ban tei ïa ka dam bad ngi hap ban pynkynriah ïa ka jaka. Namar kata, ka la shim por la jan shisnem namar ngi donkam ruh ban shna surok ban poi shaka dam bad mynta ka jingtei ïa ka dam kala ïaid shakhmat” u la pynpaw.
U Myntri u la pyntip ba kane ka projek ka thmu ban pynbiang um haduh 15 million liter shisngi (MLD) ha kaba sdang hynrei ka tnat ka buh thong ban lah pynbiang um haduh 50 million liter MLD.
Hadien bala pyndep, kane ka project kan pyndap um ïa ki longïing ha New Shillong Township nalor ki 32 tylli ki shnong ba marjan, u la ong haba bynrap ba ka wah Umkhen ka dei ka tyllong um kaba biang bha.