Shillong, Risaw 02: Ka Meghalaya High Court ka la pynpaw ka jingsngewhun ba ka jingtyrwa kaba long kawei la wanrah na ka bynta ban pynheh ïa ka Shillong Airport.
Ha ka hukum ba la pynmih hadien ka jingsngap bishar ïa ka PIL halor kane ka kam, ka Ïingkashari ka la ong, “Kane ka Ïingkashari ka la shem ba kane ka dei ka sien kaba nyngkong ba ka la don ka jingtyrwa kaba long kawei ba la buh ha ka jaka na ka bynta ban pynheh ïa ka Airport, bad la kyrmen ba yn shim bishar ïa ka ha shwa ban pynkut ïa kane ka kam hapoh ka por ba la ai, bad ïa kane ka kam yn sa bishar biang ha ka 24.10.2024.”
Haba sdang ka jingbishar, K Khan, AAG ba la ïarap lang da A.H. Kharwanlang, Addl. Sr. GA ki la pynpaw hakhmat ka Court ka D.O. letter tarik 27.09.2024, ha kaba ki nongjubab na ka jylla ki la ithuh ïa ki jingdonkam kumba la pruid dak ha ka Master Plan ba la aiti da ka Air Authority of India (AAI), bad ka la buh ruh ha ka jingthoh ban mynjur ïa ka project.
“Dr. N. Mozika, DSGI ba la ïarap da K. Gurung, counsel ba la mihkhmat na ka bynta ka Airport Authorities la aiti ba na kane ka jingmih ki kam kaba long kaba biang, ka Airport Authority of India kan donkam katto katne ka por ban buh lang ïa ka jingtyrwa, ban buh hakhmat ka Directorate General of Civil Aviation (DGCA). U la kyrpad ba lada long kaba lah ban shah haduh 8 taïew ka por na ka bynta kane ka kam bad ïa kane ka jingkyrpad la shah,” ong ka court.
