Shillong, Jylliew, 29: U Superintendent of Police ka East Khasi Hills District u Bah S. Nongtnger ha ka sngi Thohdieng u la pynmih ïa ka hukum kaba bthah ïa ki trai kali kiba tah plastik ïong ïa ki ïit kali bad kiba pyndait be-aiñ ïa ki Siren ha ki kali ba ki dei ban weng noh mardor naduh ba la pynmih ïa kane ka jingpynbna.
“Ïa kiba leh pyrshah yn pynshitom katkum ki kyndon aiñ,” la ong u SP.
Ha u kyrwoh, u SP u la ong, “ka tnat Pulit ha distrik ka la lap ba bun ki kali kiba tah plastik ïong ïa ki ïit kali kaba la long kum ka jingpynkheiñ ïa ka hukum jong ka Supreme Court of India kaba WP (C) No. 265 of 2011, ha kaba ka Ingbishar Supreme Court ka la mana tyngeh ban tah plastik ïong ïa ki ïit kali la ka long katno katno persen ruh (Visual Light Transmission) jong ki ïit kali, ka ïit ba shakhmat bad shadien bad ki ïit na kynriang kali.
“Ki la don ruh ki jingujor kiba bun na ki paidbah ba katto katne ki kali ki ju pyndait be-aiñ ïa ka Siren ha kali,” la pyntip u SP.
