Hukum u Myntri ka Deptt – Pynshisha ba ïa ka minimum wage la pyntreikam neem ha baroh ki Block

Shillong, Naitung 21 : U Myntri ba peit ïa ka tnad C&RD Block ka sorkar jylla, u AT Mondal u la bthah ïa ka Department ba kan pynshisha la ka la pyntreikam neem ïa ka Minimum Wages ha baroh ki Block kiba don ha ka jylla.
Kane ka jingbthah ka la wan hadien ba ka sorkar jylla ka la rai ban pynsangeh noh shwa ïa ka jingplie ïa ka ophis trekam jong ka Mawpat C&RD Block ha kane ka sngi Nyngkong na ka daw ka jingpyrshah jong ka shnong.
La kynnoh ba kane ka jingpyrshah kadei namar ba ka sorkar kam shym la lah ban burom ïa ka soskular kaba la ïa soi ha ka por ba la aiti ïa ka jaka na bynta katei ka ophis Block.
Kumta halor kane, haba kren bad ki lad pathai khubor, u Myntri u la ong, “Ngi la dep ban pynlong ïa ka audit. Kumta mynta ka sngi ngi la bthah ruh ïa ka tnad sa shisien ba kan peit la kum kine ki ishu ki dang don neem kiba sahteng ha kiwei ki block haba ïadei bad ka Minimum Wages.”
U Myntri u la ïathuh ba ïa ka jingïalang yn sa khot bad kiwei ruh ki tnad ban ïatai halor kane ka ishu.
Na ka liang u Myntri u la kular ruh ba halor kane ka ishu kaba la wanrah da ka Dorbar Shnong Mawpat, ka sorkar kan sa bishar bniah ban pyndep ïa ka soskular.
Ha kajuh ka por, u Myntri u ong ba ka jingdawa jong ka Dorbar Shnong ban pyntreikam da ka jingsiew (Minimum Wages) na ka bynta ki nongtrei casual kadei kaba shong nongrim. Kumta, u la khot ruh ia ki ban ïatai halor ka jingsngew jong ki markhmat, da kaba pyntip lypa pat ha shwa ba kin wan kynduh.
Na ka liang u Myntri haba jubab halor ka jingkylli, um pat lah ban ai da kawei pat ka tarik ban plie ïa ka Mawpat Block da kaba ong ba kine kin sa urlong tang hadien ba la pynbeit ïa ki ishu bad ka jingsngew jong ki paidbah nongshong shnong.