Hukum u CM Manipur ïa u DC Tamenglong ban kyndang ïa kiba sah be-aiñ ha ki shnong Khasi

Shillong, Jymmang, 06: U Myntri Rangbah ka Jylla Manipur u N. Biren Singh ha ka sngi Thohdieng u la hukum ïa u Deputy Commissioner jong ka Tamenglong District ban kyndang naphang ïa ki jaidbynriew Bengalee kiba la kyntur pud bad dakhol ïa ki jaka ba la buhai shnong da ki Khasi ha ki lai tylli ki shnong.
Ki Khasi ki la leit buhai shnong ha ka Jylla Manipur naduh u snem 1939 mynba ka Sorkar Bilat ka dang synshar ïa ka ri India bad haduh kine ki sngi ki don lai tylli ki shnong ba ki Khasi ki shong ki sah bad ki rep ki riang ïa kiba tip kyrteng kum ka Khedangar Khasi, ka Abam Punji bad ka Kamrangha Khasi.
Ha Khedangar Khasi ki don 600 ngut ki nongshong shnong kiba dei ki Khasi bad ka jaka kaba ki buhai shnong ka ïar haduh 200 hektar hynrei mar shiteng na kane ka jaka la kyntur pud da kiwei pat ki jaidbynriew.
Ha Abam Punji kaba heh 160 akar ka don 1010 ngut ki nongshong shnong Khasi katba ha Kamrangha Khasi kaba heh 190 hektar ki don 1500 ngut ki Khasi bad 120 hectar ka jaka ka dei kaba la shah dakhol ha kiwei pat ki jaidbynriew.
U General Sectary ka KSU Samla Donald V. Thabah ha ka jingïakren bad ki lad pathai khubor hadien ka jingïakynduh ïa u Myntri Rangbah ka Manipur u la ïathuh ba ka long kaei kaei kaba sngewtynnat ban ïohi ïa ka jingshimkhia jong u N. Biren Singh uba la hukum mardor lyngba ka Telephone ïa u Deputy Commissioner jong ka Tamenglong District ban kyndang naphang ïa kiwei pat ki jaidbynriew kiba la kyntur be-aiñ sha kine ki lai tylli ki shnong ba la buhai shnong da ki Khasi.
U la ïathuh ba u Singh u la kular ïa ka Seng ban pyntreikam da ka Inner Line Permit (ILP) ban pynher krad ïa ki poiei na ka jylla Manipur bad ban phah kem ruh naphang ïa ki poiei kiba pyndik ïa ki Khasi.
Kane ka jingtuklar jong ka KSU halor kane ka jingeh jong ki Khasi kiba shong basah ha Manipur ka long ruh da ka jingïatreilang bad ki nongïalam jong ka All Manipur Students Union (AMSU).
Katkum ka jingïathuh jong ki nongïalam shnong jong ki shnong ba shong basah ki Khasi, kane ka jingshah dakhol jaka ka la jia naduh ba la pynkha thymmai ïa ka Jirabam District da ka Sorkar Manipur ha u snem 2016.
Ka jingdakhol jaka jong ki jaidbynriew Bengalee ka long ba ki kwah ïa ki Khasi ban pynïasoh lang sha Jiribam District da kaba ïakhladnoh bad ka Tamenglong District.
Ha kane ka jingleit ïakynduh ïa u Myntri Rangbah ka Jylla Manipur, la synran lang da ki nongïalam ka KSU Barrak Valley Circle, Assam, ki dkhot ka Barrak Valley Khasi Jaiñtia Welfare Organisation, ka All Manipur Student’s Union, ka Rongmei Naga Students Organisation, Manipur, ki Waheh Shnong jong ki lai tylli tylli ki shnong ba sah ki Khasi bad u General Secretary ka North East Student’s Organisation u Sinam Prakash Singh.