Shillong, Lber 30: Ka Ïingkashari Meghalaya High Court hynne ka sngi balang, kala hukum ban pynlong ïa ki jing talasi ba kyndit kyndit ïa ki kali shipai namar ka jingkynnoh ba don ki khep ba wan pynpoi ïa u droks sha Jylla da ki trok shipai, kiba ju lait na ki jingshah talasi.
Ïa kane ka hukum la pynmih da ka Division Bench ba kynthup ïa u Chief Justice Sanjib Banerjee bad u Justice W Diengdoh haba shong bishar ïa ka Public Interest Litigation (PIL) bala mudui da u Chairperson barim ka Meghalaya State Commission for Protection of Child Rights (SCPCR) jong M Kharkongor.
Haba shong bishar,u Amicus Curiae ula ai ïa ki jingtip ba bniah shaphang ki jaka kiba jyllei eh ka jingkhaii droks. Kine ki jaka ki kynthup ïa bun tylli ki Shnong ha Shillong, ki shnong ha khapsor.
U Amicus Curiae ula pynpaw ruh ba naba ka Jylla Meghalaya ka dei ka lynti ba pynïaid (Transit Route) ïa u droks uba mih na ka Ri ba marjan lane ba leit sha ki Ri ba marjan, kala don ka jingpynïaid iew ïa u droks bad dang shen, uwei u shipai na Imphal ba bat ïa ka kyrdan Major, ula shah kem halor ka jingdonkti ban pynïaid ïa u droks.
Ka Ïingkashari ka ong ruh ba ka kam bala leh da u Amicus Curiae ba kynthup ïa ka jingleit jurip ïa u Correctional Homes, Opiod Substitution Thepary (OST) Centre bad shem ruh na ki katto katne ki ba sah ha kine ki jaka ba ka jing ïoh wan rung suk jong u droks ka lah ban dep na ka jingiadon bynta lang jong ki shipai kiba heh kyrdan.
“Ym sngewlah ngeit satia ïa kum kane ka jingkynnoh hynrei ym dei ban shu kheiñ sting namar kat kum ka jingia thuh jong ki briew ba sah kine ki Centre, kila ong ba ki don ki khep ba ïa u droks la wan pynkit da ki trok shipai namar ki lait na ka jingshah talasi” kala ong.
Ka Ïingkashari kala bthah ba ïa ka copy jong kane ka hukum dei ban pynpoi sha u General-Officer Commanding, 101 Area bad ruh sha u Director General ka Assam Rifles ban pynthikna ïa kane ka kam bad ban shim ïa ki sienjam ha kaban lah pyrrkhing.
“Lada kane ka jingïathuh ka dei kaba shisha, ka dei ruh ban don ka kaiphod syntiat (intelligence) bala ïoh da ka Jylla haba ïadei bad kane bad ka Chief Secretary ka dei ban ïakren bad ki Shipai lem bad ka Asem Rifles khnang ba ki Hehduh jong ki shipai kin tip ïa kane ka jingeh bad kin leh eiei noh mardor” kala ong.
Ka Ïingkashari kala hukum ruh “Kan iarap shibun lada don ki kynhun shipai ban talasi kali ha kylleng ki jaka khnang ba kin talasi kyndit kyndit ïa ki kali shipai, kiba lait na ka jingshah talasi ha ki Pulit”.
Ha kajuh ka por, ka Ïingkashari kala ong ba kawei pat ka bynta kaba hap ban khmih bniah bha ka dei ka jingpyn kha ïa ki Therapy Centre hapoh ka Jylla namar ba bun ki Longïing kiba shah ktah na u droks, kin hap phai khmat shabar jong ka Jylla ban phah ïala ki jong ki Khun ki Kti ban ïoh jingsumar sukher na ka daw ka jingbym don ki Centre ha Meghalaya.
“Ka long kaba donkam ruh ban don ha de-addiction centre, khamtam ban ai jaka sah ïa ki kynthei kiba la ngop ha ki jingdih droks” kala ong haba buh tarik ban shong bishar biang ïa kane ka kam ha ka 28 tarik Ïaiong.
