Hukum ka Sorkar ïa ki District Council ban khang noh ïa ki khyrdop lum pisa ha surok

Shillong, Jylliew 23 : Ka sorkar jylla ha ka sngi Palei ka la bthah ïa ki Autonomous District Council ba don ha ka jylla ba ki dei ban khang khyrdep lut noh mardor ïa baroh ki khyrdop lum khajna kaba ki pynieng ha kylleng ki surok bah kiba don ha ka jylla.
Katei ka rai ka la mih hadien ka jingïalang ba la lum da u Myntri Rangbah ka jylla, Conrad K Sangma ha kane ka sngi bad ki District Council ha ryngkat ka jingdonlang u Symbud Myntri Rangbah ka jylla, Bah Prestone Tynsong kumjuh u Myntri ka tnad District Council Affairs ka sorkar jylla, Bah Lahkmen Rymbui.
“Ka sorkar jylla kam shym la buh jingkylli ïa ka bor jong ka District Council ban lum khajna ha u pud u sam jong ka, hynrei ka jingtuklar kadei pat ba kam dei ban long ha ki surok bah,” ong u Myntri ka tnad DCA haba kren bad ki lad pathai khubor.
U la ong ruh ba ka jingtuklar jong ka sorkar ka long ba ki District Council kim dei kiba la pynkupbor da ka aiñ na bynta kino kino ki jinglum pisa ha shi lynter ki surok bah National Highway lane State Highway. “Kumta, ngi la kyntu ïa ki ba kin khang khyrdep lut noh ïa baroh ki khyrdop lum khajna mardor bad na ka liang ki District Council ruh ki la kohnguh,” u la ong.
Na ka liang u Myntri u la ïathuh ruh ba haduh mynta kim pat ïoh jingtip katno tylli ki khyrdop ba kitei ki Council ki pynieng bad naduh mynno ki la sdang ïa kitei ki kam.
La ïathuh ruh ba ha katei ka jingïalang la ïakren ruh halor ki jingeh bad ki jingtyrkhong pisa kiba bun ba ka Council ka kynduh bad kumta ka sorkar jylla ka la kular lut ki lad ki lynti ban ïarap katkum ka jingkotbor jong ka.