Shillong, Nailar 05: Ka Meghalaya Energy Corporation Limited(MeECL) ka la pynmih ïa ka hukum ba baroh ki karkhana kiba ym pat siew ïa ka bai thang bording ki dei ban siew noh sha ka tnad lym kumta na ka liang ka tnad kan ai da ka jingpynshitom kaba tyngeh.
Ïa kane la ïathuh da u Symbud Myntri Rangbah ka jylla u ba bat ruh ïa ka tnad Bording u Bah Prestone Tynsong. U la ïathuh ruh ba na ka liang ka tnad bad khamtam ka Meghalaya Power Distribution Corporation Limited(MePDCL) ka la leh la ka kamram ban ïoh ïa ka bai bording kaba ki karkhana ki dei ban siew ïa ka bai thang bording jong ki.
Kne ka jingkren jong u Bah Prestone Tynsong kadei hadien ba ka la mih ka jingkynnoh na ka seng National Hynñiewtrep People Federation (NHPF) ba ki don ar tylli ki Karkhana ha Umïam bad ha Byrnihat jong ka Ri-bhoi district kim shym la siew ïa ka bai thang bording kaba la kot haduh T.44.57 klur tam naduh u snem 2005.
U Bah Prestone u la ong ‘kam pher la kidei ki longing paidbah ne ki karkhana na ka liang ka tnat MePDCL ka dang ïaleh ban pynthikna ba baroh kidei ban siew beit ïa ka ram bai thang bording’
“Kampher la kadei T.44 klur ne katno hynrei ki karkhana ne ki riewpaidbah kidei ban sngewthuh ba kino kino ki bym shym siew ïa ka bai thang bording, ki dei ruh ban siew ryngkat bad ka sut bad katta ki dang pynslem, katta ka sut ka nang heh” ong u bah Prestone.
Shuh shuh u Bah Prestone u la ong ba ka sorkar lyngba ka tnat MePDCL ka la phah ktien sha baroh ki bym pat siew ïa ka bai thang bording ba kin siew noh ïa ka ram namar ka tnat kan ïai budien ban pynthikna ba baroh kidei ban siew ïa ka bai bording.
U la ong ba ki don katto katne ki karkhana ba ka tnat ka la ot ïa ka bording namar ka jingbym lah jong ki ban bud ïa ki jingbthah ka tnat bording bad kiwei ruh ki karkhana ruh ki dei ban sngewthuh ba ki lah ban shah ot bording lada kim siew ïa ka bai thang bording.
