Hukum ka Ïingkashari ïa ka sorkar jylla ban pynïoh ka jaka tep briew ba ïamonlang hapdeng ki kynhun

Shillong, Naitung 07: Ka Meghalaya High Court ka la hukum ïa ka sorkar jylla ban pynïoh ka jaka na ka bynta ka jaka tep ba ïamonlang da kaba shim ïa ka jaka ne da kaba ïasoi paralok bad ki riew shimet.
Kane ka la wan hadien ba ka ïingkashari ka la pynjlan ïa ka jingkyrmen jong ka public interest litigation (PIL) kaba la sdang ban pynleit jingmut halor ki lad ban tep ne thang briew na ka bynta ki Khasi, Jaiñtia, bad ki jaitbynriew Hindu da kaba kynthup ïa ki kam lum jingtep ban ïabynta lang hapdeng ki kynhun Balang Khristan.
Ha ka hukum ba la shim bishar ha ka sngi Nyngkong, ka division bench ba kynthup ïa u Chief Justice IP Mukerji bad u Justice W Diengdoh ki la bthah ruh kumjuh ban thaw ka committee ka ban khlieh da u Chief Secretary ban pynlong ki jingïalang hapdeng ki nongshong shnong, kynthup ïa ki district council, ki Balang, ki administrative officer, bad state legal counsel.
Kane ka committee kan ïasyllok halor ka jingshim jaka na ka bynta ka jaka tep ba monlang bad ban shim ka rai halor ki jingïakajia ba ïadei bad ka jingïasam ïa ka jaka tep briew.
Ka meij ki nongbishar ka la shem ba ki don tang khyndiat ki jaka tep briew ba ïatep lang haba nujor ïa ka jingdon kiba ïap bad ka jingdawa na ka bynta ka jaka ban tep briew.
“Ki shnong ne ki don ki shnong kiba don ki jaka ka raid kiba longtrai da ki paidbah nongshong shnong. Shi bynta na ka khyndew lah ban ai sngewbha na ka bynta ka jingthmu ka jaka tep lang. Ha kawei ka liang katto katne ka jaka la donkam ha kylleng ki district na ka bynta kane jaka tep lang, lada ka don kano kano ka jingïaid shaphrang kaba dei ban leh ban lah pynbeit ïa kane ka jingeh. Kine ki jaka donkam ban shim da ka sorkar lyngba ki rukom treikam thied jaka ne lyngba ka jingsiew ba shimet ne ka jingïasoi soskular. Ngi bthah ba dei ban shim ki sienjam ba mardor badei ban shim da ka sorkar jylla ban pynïoh ïa ka jaka na ka bynta ka jaka tep ba monlang,” ka la ong.
“Ngi bthah ba ka Amicus Curiae kan leit sha u Chief Secretary ka jylla khnang ba ka Committee kaba kynthup ïa kito kiba la shah jied ha kaba u Chief Secretary un long u Chairperson kaba dei ban thaw da ma u bad ba dei ban pynbeit pynlong ki jingïalang hapdeng ki nongshong shnong, ba kynthup ruh ki nongmihkhmat na ki District Council, ki nongmihkhmat na ki Balang ne kynhun niam, ki administrative officer, state legal counsel, ki nongïalam shnong bad kiwei, na ka bynta ka jingthmu ban shim ïa ka jaka na ka bynta ka jaka tep bad ban pyntreikam ïa ki hukum jong ngi,” bynrap ka meij ki nongbishar.
Ïa ka PIL ha kaba sdang la ujor haba ïadei bad ka jingduna ka jaka tep briew bad ka jingbym mon hapdeng ki kynhun jaitbynriew Khasi-Jaiñtia bad Hindu ban ïabynta ïa ki jaka tep.
La bthah ïa Amicus Curiae ban aiti ïa ka kaiphod kaba don ki jingïakren jingïalang ha shwa ban wanphai biang ka 30 tarik mynta u bnai, 2025.
Ka sorkar jylla kan hap ban siew T. 1 lak kum ka ad hoc remuneration sha Amicus Curiae ha shwa katei ka tarik ban wanphai.