Shillong, Ïaiong 22: Ka Ïingkashari Meghalaya High Court hynne ka sngi thohdieng kala hukum ïa ka Sorkar Jylla ban pyntreikam ïa ka Solid Waste Management Rules, 2016 ha baroh kawei ka Jylla.
“Ka Sorkar Jylla ka dei ban khmih ïa kane ka bynta ym tang ban phaikhmat sha ka Jowai hynrei ha baroh kawei ka Jylla” ong ka Ïingkashari ki arngut ki Nongbishar bala khlieh da u Chief Justice Sanjib Banerjee haba shong bishar ïa ka Public Interest Litigation (PIL) bala mudui da ki Waheh Shnong, Jowai halor ka jingdonkam ban lum thikna ïa ki ñiut na sor Jowai.
Kane kala mih hadien bala pyntip na ka liang ki Rangbah Shnong jong ki hynriew tylli ki Shnong kiba la shah pyn long mamla ha ka mukotduma, ba ka Sorkar Jylla ka dei ban pytnhikna ba ka Solid Waste Management Rules, 2016 bala pynbna da ka Sorkar Pdeng kat kum ka bor bala pynkup da ka Environment (Protection) Act, 1986, ka dei ban treikam kham kloi katba lah da kaba thaw ïa ki Shnat treikam bad ki jingtei kiba donkam.
Ha kajuh ka por, ka Sorkar Jylla bad ka Municipal kila pyntip ïa ka Ïingkashari ba kila dep ban ithuh ïa ka jaka theh ñiut ba shipor bad mynta ka jingkit ïa ki ñiut na sor Jowai kala sdang.
Kat kum ka jingpyntip ka Jowai Municipal Board, ka Board kala dep mynta ban pynkhuid ïa ka surok bah bad la khmih lynti ba ïa ki ñiut na Iew yn sa lah ban pynkhuid noh haba kut jong ka taiew.
Ka Ïingkashari kala ong ba ym i donkam shuh mynta ban pynmih ïa kano kano ka hukum naba baroh ki liang mamla kynthup ka Sorkar Jylla, la i kumba kila shimkhia ïa ka kam bad kila dep pynlong ïa ka jingïalang ban ithuh ïa ka jaka ban theh ñiut ba shipor.
“Ai ba ka jingbishar ïa kane ka mukotduma kan long biang hadien artaiew. La kyrmen ba kan don noh ka lynti ban weng ïa kine ki jingeh hadien habud” kala ong haba pyntip ba ka kashari kan sa shong bishar biang ïa kane ka kam ha ka 13 tarik u Jymmang.
Ha ka sngi balang, uwei u trai jaka na East Jaiñtia Hills Distrrict ula mynjur ban ai ïa ka jaka ha kaban pynlong jaka theh ñiut ba shipor na ka bynta ban leit theh ïa ki ñiut kiba la kynton ha Iawmusiang naduh u bnai Rymphang mynta u snem.
Une u trai jaka bad nongshongshnong ka Moolamylliang u Damewanhii L Rymbai ula iasoi ïa ka deed of agreement bad u Chief Executive Officer (CEO) ka Jowai Municipal Board ban pyndonkam ïa ka jaka jong u kum ka jaka theh ñiut ba shipor na ka bynta shibnai.
Ka Jowai Municipal Board (JMB) kala donkam kyrkieh ïa ka jaka ban pynlong jaka theh ñiut namar ka jingïai kynton jong ki ñiut ha Iawmusiang, hadien ba ki katto katne ki Shnong kila pyrshah jur ban wan bret ïa ki ñiut na sor Jowai ha Mynkjai, kaba dei ka jaka theh ñiut ba shipor.
Kat kum ka soskular, ka JMB kala mynjur ban siew tang T. 700 shi kali kum ka musur sha u trai jaka namar kane ka jingai sngewbha ïa ka jaka.
