Shillong, Nailar 14: Ka Ïingkashari Meghalaya High Court ka la bthah ïa ka Shillong Municipal Board (SMB) ban aiti ka kaiphod halor ka jingdon kiba die madan ha surok kynthup ïa kito kiba khlem don ki laisen ha ka thaiñ Laitumkhrah.
Kane ka hukum ka Ïingkashari ka la wan kum ka jubab ïa ka application ba la ujor da ka Seng Samla Laitumkhrah “Ieng Skhem Ha Ka Hok,” ka society ba la register, ban long mamla ha ka Public Interest Litigation (PIL).
“Ngi la bthah ïa ka Shillong Municipal Board ban ai ka kaiphod sha ka Ïingkashari halor ka jingdon ki laisen ba la sam halor ka kam kiba die madan ha ryngkat bad ki kyrteng ki briew na ka thaiï Laitumkhrah,” ong ka hukum ka division bench kaba kynthup ïa Chief Justice IP Mukerji bad Justice W Diengdoh ba la pynmih ha ka sngi Palei.
“ÏA ka Board la bthah ruh kumjuh ban keit jurip, kan tohkit ban ïathuh hapoh ka kaiphod ïa ki kyrteng bad ki jingdon kiba die madan kiba dei ïa ki mar khlem ki laisen ha ka thaiñ. Ïa kane ka kaiphod dei ban aiti sha ka Court ha ka 28 tarik mynta u bnai, 2025,” ka la bynrap.
Ka Seng Samla Laitumkhrah ka la pynpaw ruh ïa ka jingsngewkhia kaba khraw halor ka jingbym long aiñ bad kiba khlem ïoh bor kiba die madan ha Laitumkhrah jong ka nongbah Shillong.
Kine ki hukum da ka Ïingkashari ka long ban pynkhuid ïa ki thaiñ jong ka nongbah na ka jingdon kiba die madan kaba khlem laisen, kum ka Police Bazar ban pynjlan pat sha Laitumkhrah ban kyndang ïa kiba die madan na ki lynti ïaid kjat, na ki surok nangta ban pynkylluid, bad ban pynlong kiba khuid bad kiba don ki jingïada ïa kiba ïaidkjat bad ka jingkylluid ki surok.
Hynrei ïa kane ka kam ba la wanrah da kaba aplai la pyrshah da ka seng kaba kyrpad ka Meghalaya and Greater Shillong Progressive Hawkers and Street Vendors Association (MGSPHSVA) bad Advocate na ka jylla halor ka nongrim ba ka Court ka don ïa ka PIL kaba la dep shim kam halor kane ka jingeh ha baroh ki kam jong ka Shillong. Kane ka kam bishar ka kynthup ha baroh kawei ka nongbah Shillong.
Katkum Tangi B Additional Advocate General, kane ka kam kaba la leh da ka State agency ha Police Bazar kan dang ïaid shakhmat sha kiwei pat ki thaiñ lyngba ki kyrdan kyrdan.
Kam long kongsan shuh ïa kiwei pat ki kynhun bad ki kynhun ban donkti ha kane ka public interest litigation naba kane kan nang pynkynlaiñ ïa ki kam.
Ka Ïingkashari kan pyrkhat ïa ka jingjylla jong kaba bynrap ka Seng Samla Laitumkhrah kum ka kynhun kaba jubab ha ka tarik ba la buh pynjlan.
“Kumba ka long mynta, ïa ka Seng Samla Laitumkhrah la shah ba kin ïashim bynta ha ki kam da ka jingdon jong hi, khem da bynrap kum ka party. Ïa ka jingkylli halor ka jingshah ne kynthup kum ka party respondent yn sa pyrkhat ïa ka tarik ba la pynjlan ne adjourn,” ka la ong.
