Shillong, Rymphang 13 : Ka ïing Bishar ba hakhlieh duh ka ri ka Supreme Court mynta ka sngi Palei, ka la hukum ban pyndam bad pynwai noh syndon ïa ka CMJ University ha Meghalaya, haba pynksan ïa ka rai jong ka Sorkar Jylla ban khangdam ïa kane ka University ha u snem 2014 namar ka jingshukor ïa ki hajar ngut ki samla pule da kaba ai degree certificate thok.
Ka ïing Bishar ba ha khlieh duh ka Ri kala pynksan ïa ka hukum ka sorkar Jylla,da kaba kyntait ïa ka hukum jong ka ïing Bishar High Court jongka jylla Meghalaya ha u snem 2021 ba bthah ban pyrkhat biang sa shisien ïa ka jingrai pyndam ïa kane ka skulbah.
ïa kane ka jingkyrpad la mudui pyrshah ïa ka hukum ba la pynmih ha ka 6 tarik Jymmang 2021 da ka Division Bench ka ïing Bishar High Court jongka Meghalaya ha kaba ka hukum ba 16 tarik Naitung, 2015 ba la pynmih da u Single Judge ka ïing Bishar ha ka Writ Petition (C)No 177 of 2014 la pyniap bad kdat noh sharud bad ïa kane ka kam la phah pat sha u Single Judge ba un shim ïa ka rai kaba ïahap haba ïadei bad ka jingtreikam jong ka hukum, ban pynduh pyndam ïa ka Chandra Mohan Jha University, hapoh ka hynriew bnai.
Lyngba ka hukum ba 16 tarik Naitung, 2015, u Single Judge ka High Court ula kheiñ iap bad kdat sharud ïa ka hukum ba 31 tarik Lber 2014 ba la pynmih da ka Sorkar Meghalaya ban pyndam ïa ka University bad kheiñ iap ïa ka show cause notice ba 12 tarik Naiwieng 2013 bad 24 tarik Kyllalyngkot, 2014 bala phah sha ka University da ka Sorkar Jylla.
Ha ka hukum, ka ïing Bishar ba kynthup ïa u Justice PS Narasimha bad Sandeep Mehta la ong “Kat kum ka rukom pynïaid ba la pruid dak ha ka kyndon 14 (1) jong ka Act ban thung ïa u Chancellor Chandra Mohan Jha (CMJ) ym shym la bud da ka CMJ University bad hadien kane, ka jingthung ïa u Chancellor ka CMJ University kam dei kaba khlem jingmut bad ka bym shong aiñ naduh kaba sdang”.
