Hukum ka ïingbishar ïa ka sorkar ban pyntreikam biang ka Weighbridge ha Ratacherra hapoh 8 taiew

Shillong, Nohprah 15 : Ka ïing Bishar High Court jong ka jylla ka la hukum ia ka sorkar jylla ba ka dei ban pyntreikam biang ïa ka Weighbridge ha Ratacherra, East Jaintia Hills hapoh phra taiew.
Kane ka hukum ka la mih hadien ba ka sorkar ka la shong bishar ïa ka Affidavit ba la ujor kaba pynpaw ba kane ka weighbridge ka khlem treikam shuh naduh u Nailur 2024.
“ Ngi bthah ïa ka tnad Transport ba ka dei ban pynbiang lut nadong shadong ban pyntreikam noh pura ïa kane ka weighbridge hapoh 8 taiew naduh mynta ka sngi bad ka Division Bench kaba kynthup ïa u Chief Justice Soumen Sen bad Justice H.S Thangkhiew ki shong bishar ïa kane ka mukotduma.
Ka ïing bishar ka pynpaw ruh ka jingsngewkhia jur halor ka kaiphod kaba la ai da ka sorkar halor ka jinglong jingman kane ka weighbridge.
U Commissioner ka tnad Transport u la ai ïa ka kaiphod ha ka 8 tarik u Jymmang 2025 kaba la lap hadien ba kam long kaba bit ba biang. Kumta halor kane ka ïing Bishar ka la maham ïa ka sorkar ba kan long phikir bha haba ai ïa ka kaiphod bad khamtam ha kaba pyni ïa ki lynti kiba la shim ban pynbha ïa kane ka weighbridge.
ïa kane ka mukotduma la buh ban shong bishar biang ha ka 2 tarik Lber 2025 ryngkat bad ka hukum ban ai kaiphod biang halor ka jingshna pynbha ïa kane ka weighbridge.