Hukum ka ïing bishar HC ïa ka sorkar ban wanrah ïa ka plan sam umbam umdih ha Shillong

Shillong, Naitung 07 : Ka ïing bishar High Court jongka jylla mynta ka sngi Thohdieng, ka la hukum ïa ka Sorkar Jylla ban wanrah noh ïa ka plan ba bun bun snem bad ba shipor halor ka rukom sam umbam umdih ha Nongbah Shillong.
Ha ka hukum, ka Division Bench ka la ong “Nalor ka jingeh ba shim dor rem jong ki kali kit um ba sam um ha kylleng ki jaka ka Nongbah, kaba ka Sorkar ka dei ban buh kyndon mardor bad ban tuklar, ka dei ban wanrah ruh ïa ka plan ba bun bun snem bad ba shipor bad kumno ka Sorkar kan tip haduh katno kan long ka jingdawa ïa ka um, shu buh 20 snem hadien”.
Ka la ong ba ka Sorkar ka dei ruh ban shimkhia bha ha ka ban pynkhuid bad pynkhie im pat ïa ki wah kiba don ha sawdong ka Nongbah khamtam ki wah bad ki wahduid kiba la shah pynjaboh pura.
Ka District Council ruh ka dei ïa ka ban shim lang ïa ka jingkitkhlieh ban pynthikna ba ki Nongshong shnong kiba sah hajan ki wah kin leh ïa kano kano ka kam da ka jingkitkhlieh.
“Ki don ruh ki project ka Sorkar Pdeng kiba don kyrhai ka pisa, khamtam sha ki Jylla ka Thaiñ Shatei Lam Mihngi kiba lah ban ïoh” ong ka ïing bishar haba shong bishar ïa ka PIL bala mudui da u Working President ka KHNAM Bah Thomas Passah.
Haba bthah ïa ka Sorkar Jylla ban ai ïa ka affidavit ba batai bniah ïa baroh ki mat ba la kdew haneng, ka ïing bishar ka ong ba ka affidavit ka dei ruh ban kdew kren halor ka Greater Shillong Water Supply Scheme kynthup la ki dang don ne em ki jaka nalor ka Mawphlang, ba la tyrwa kum ka jaka ban shna shuh shuh ïa ki reservoir.