Hukum ka HC ïa ka sorkar bad KHADC ban leh da kaba tyngeh ïa ki jingtei beaiñ harud wah Umiam

Shillong, Nailur 26 : Ka ïing bishar High Court jongka jylla mynta ka sngi ka la bthah ïa ka sorkar jylla bad ïa ka Khasi Hills Autonomous District Council (KHADC) ban leh da kaba tygneh ïa kito ki jingtei ba la tei beaiñ harud ka wan Umiam.
Ha ka hukum ba la pynmih hadien ba la bishar ïa ka mukotduma PIL halor ka jingkhuid jingsuba ka wah Umiam, ka ïing bishar ka la pynpaw “ Namar ba ka KHADC ka la pynshai ba ki ar tylli ki jingtei harud ka wah Umiam ki dei kiba la long trai da u Philosopher Iawphniaw bad B.Khongwar, ka trai jongka Ever Banalari Returant cum Guest House ki dei kiba la tei beaiñ khlem da ïoh jingbit bad baroh ar ka sorkar bad KHADC ki la leh ïa kaba donkam kat kum ki kyndon aiñ ban pynsangeh ïa kitei ki jingei.
La bthah ba dei ban pyntip sha u Philosopher Iawphniaw jongka Moon View Cafe bad B Khongwar jongka Ever Banalari Resturant ba ka jingbishar halor kane kan long biang ha ka 29 tarik Nailur 2022.
La bthah ïa u SP Mahanta uba ïeng na ka bynta ka ïing bishar kum u Amicus Curiae ban pynthikna ba kine ki hukum jongka ïing bishar ki dei ban poi ha kitei kitei ki arngut ki trai jong kitei ki jingtei. Khnang ba kin ym ïoh ban saitkhuid ba ki khlem ïoh kopi ïa ka hukum dei ban wah ha ki kynroh bad shondur ïa kita ki notice ban pynthikna ba ki kopi ki la poi sha ki.
Kham mynshwa la ai notice ruh sha u Cannyson N Marbaniang u trai jongka Hills Cafe hajan ka Mahindra Showroom. La pyntip ba kane ka Cafe ka don halor lum na kawei pat ka liang jongka wah Umiam.
Hooid ka KHADC ka pynthikna ba kane ka dei halor lum ba ka lah ban dei da ka jingbakla ba la phah notice hynrei wat la katta ka la pynpaw la thaw ïa katei ka cafe ruh khlem da ïoh jingbit na ka State Pollution Control Board kaba long kaba beaiñ namar ha kaba ïadei bad ki jingtei ïing ym lah ban pynïaid shakhmat khlem da ïoh jingbit na katei ka Board.