Shillong, Nailur, 02: Ka Deputy Commissioner jong ka East Khasi Hills District ka la hukum ïa ki shlem treikam ban bud pyrkhing ïa ka Sexual Harassment of Women at Workplace Act of, 2013 da kaba thaw ïa ki Internal Complaints Committee hapoh 30 sngi hynrei lym kumta kin shah pynshitom hapoh ka Section 26 jong ka Aiñ.
Kane ka jingpynmih hukum jong ka Deputy Commissioner ka dei namar ka jingbym patiaw ki shlem treikam sorkar bad ki shlem treikam ba la pynïaid da ki riewshimet ban thaw ïa ki Komiti.
Ka jingbthah kan treikam ruh kumjuh ha ki jaka pule, ki jaka sumar, ki Corporate Office bad ki tnad treikam Sorkar ha baroh kawei ka East Khasi Hills, kaba kynthup ïa ka nongbah Shillong.
Hapoh 30 sngi dei ban thaw ïa ki Internal Complaints Committees katkum ka jingbthah hapoh ka Sexual Harassment of Women at Workplace Act of 2013, lane kin mad ïa ki jingshah pynshitom.
Kane ka jingpynmih hukum ha ka 1 tarik, Nailur ka long ruh kum ka ‘jingmana ba khatduh’ shwa ban sdang ïa ka jingpynshitom.
Ka jingbthah kan treikam ha barohki shlem treikam hapoh ka distrik, naduh ki ophis Sorkar haduh ki kompeni shimet, kaba dawa ïa ki ban buh ïa ki lad ki lynti kiba pura ban pdiang ïa ki jingujor halor ki jingshah thombor ha ki shlem treikam. Hapoh ka Section 4 jong ka aiñ ka Sorkar Pdeng, kine ki komiti ki dei ban kynthup ïa ki dkhot kiba nabar bad ban bud ïa ki kyndon treikam ba kyrpang
La bthah ruh ïa ki ophisar na ka ophis ka Deputy Commissioner ba kino kino ki bym kohnguh dei ban pynshitom katkum ka Section 26 jong ka aiñ, kaba ailad ïa ki bor synshar ban daiñ kuna bad kiwei kiwei ki jingpynshitom ïa ki nongaikam ki bym lah ban pyntreikam ïa ka jingbthah katkum ka aiñ. Kane ka aiñ ka la treikam la palat shisnem, hynrei ka jingpyntreikam kam pat treikam pura ha kiba bun ki distrik jong ka ri India.
