Hukum ka Committee jong ka High Court ïa u DC bad SP ban pynkhlaiñ pahara bad khang ïa ka jingtih dewïong be-aiñ ha EJH

Shillong, Rymphang 4 : Ka Committee ba marwei briew ba la thung da ka ïing Bishar High Court jongka jylla ba la khlieh da u (Rtd)Justice BP Katakey kala bthah ïa u Deputy Commissioner bad Superintendent of Police ka East Jaintia Hills, ba kin peit thuh ïa ki jaka kiba lah ban don ka jingtih dewiong beaiñ bad ban khang ïa ki bad ha kajuh ka por ban pynkhlañn ïa ka jingïaid pahara khnang ban tehlakam ïa kane ka kam be-ain.
Ha ka Kaiphod ba 34 ba la aiti sha ka Iing Bishar High Court ka jylla, ka Committee ka la pynpaw ïa ka jingdonkam ban ithuh ïa ki jaka shnong kiba lah ban don ka jingtih dewiong beaiñ, da u Deputy Commissioner ha ryngkat ka jingïarap u Superintendent of Police ka District bad ban pynkhlaiñ ïa ka jingïaid pahara ha kine ki jaka bala ithuh ka ban long man ka por, namar ka kam tih dewiong beaiñ ha EJHD ka dang ïaid haduh mynta.
“Donkam ban pahara ïa ki jaka rung bad jaka mih jong kine ki jaka khnang ba kan nym don ka jingkhaïi ïa u dewiong ba tih beaiñ na kine ki jaka ne shnong. ïa kane ka kam la donkam ban khmih da u DC bad u SP da lade, ki ban hap aiti ïa ki kaiphod ba bniah manla u bnai kynthup ïa ki kam ba ki la leh ban khanglad ïa ka jingtih dewiong beaiñ bad ruh ki kam ba ki la leh kat kum ki aiñ haba lap ïa ka kam tih dewiong beaiñ, sha u Chief Secretary ka Sorkar Jylla lane u briew ba u buh, u ba bat ïa ka kyrdan ym hapoh ka kyrdan Additional Chief Secretary. U Chief Secretary/Addl Chief Secretary ki dei ban ai ïa ki jingbthah ba donkam, na ka por sha ka por, ban pynthikna ïa ka jingkhang ïa ki kam tih dewiong beaiñ ha EJHD” la bynrap ka kaiphod.
Ka Committee ka la hukum ruh ban lilam noh mardor ïa ki dewiong ba la dep shim jingkheiñ, ban tohkit ïa ka jingpyntip halor ka jingduna u dewiong ba 40,554.72 MT, bad ban mynjur ïa ki aplikeshon ban khaïi ïa u dewiong hapoh ka 15 sngi.
“(Ngi ai jingmut) ban pynïaid noh mar mar ïa ki kam ba ïadei bad ka jinglilam ïa u dewiong ba la dep shim jingkheiñ da ka CIL ban lah pynkhuid noh ïa ki dewiong ba slum thup ha ki depot bala buh da ka CIL khlem ka jingpynslem shuh. Dei ban pynlong ïa ka jingtohkit da u Secretary ka Tnad Mining and Geology ka Sorkar Jylla halor ka jingduna u dewiong ba la dep shim jingkheiñ kaba kot 40,554,72 MT na ki depot ka CIL ha EJHS bad ban aiti ïa ka kaiphod hapoh ka artaiew”.
Ka Committee ka la bthah ruh ban mynjur noh mardor bad pynmih ïa ka hukum ba donkam halor ka aplikeshon bala thep da ka Ruthina Marak bad Rukmini Marak, da ki bor khmih ka South West Khasi Hills District, ka ban long hapoh ka 15 sngi, ïa kaba donkam ruh ban ïoh ïa ka jingbit na ka State Pollution Control Board, khnang ba u dewiong ba la thied na ka jinglilam yn lah ban khaïi noh halor ka jingsiew ïa ka pisa baroh bad ka jingbud ïa ka Revised Comprehensive Plan,2022 nalor kiwei kiwei ki kyndon kiba la treikam.
“Ka Tnad Mining & Geology ka dei ban shim ïa ki sienjam ha ka ban pyndonkam ïa ka pisa ba 100 klur tyngka kaba la thep hapoh ka CPCB” ong ka Committee haba banjur ïa ka jingdonkam ki jingtyrwa ban pyndonkam ïa kane ka pisa.