Shillong, Naitung 13 : Ka jingïalang jongka Meghalaya Democratic Alliance (MDA) kaba la long hynnin ka miet ha ïing u Myntri Rangbah u Conrad K Sangma ka la ai jinghikai ïa ki katto katne ki MLA ba kin nang ban thep vote ha ka jingjied President ba thymmai jongka ri India ka ban long ha ka 18 tarik.
ïa kane ka jingai jinghikai la leh hadien ba ki don katto katne ngut ki MLA kiba kren artatien bad kim nang ban thep vote khamtam ba ka dei ka sien ba nyngkong ba kin ïashim bynta ha ka jingiathep vote jied President.
U Myntri Rangbah ula ïathuh ba ki don ruh katto katne ngut ki MLA jongka MDA kiba la pynpaw lypa ba kin ym lah ban ïadon ryngkat ha katei ka sngi thep vote jied president namar kin ym don ha nongbah. Hynrei la ngeit skhem ba kiba lah ban ïa shim bynta kin wan lut baroh shaka jingïathep vote
Ka MDA ka don 48 ngut ki MLA kiba dei na ki party bapher bapher. Na ka liang ki MLA ba shah sospon ka Congress wat la kim pat rai la kin ai kajingkyrshan ïaka Draupadi Murmu namar ba ki khlem shah khot sha ka jingïalang ha ka sngi ba ka wan ha Orchid Lake Resort, Umiam. “ Ngin pynthikna ba baroh kin kyrshan ïa ka Draupadi bad na ka bynta kito kiba lehse ka don ka jingbakla ba khlem khot ïa ki sha ka jingïalang ruh yn sa ïakren bad pynsngewthuh ïaki” ong u Myntri Rangbah.
