Jowai, Nailur 10: Ka Society for Urban and Rural Empowerment (SURE), ha ryngkat ka jingtreilang bad ka Nongtalang College, kila sdang ïaka prokram ai jinghikai (training) halor ki rukom seng kam la jong, na ka bynta ki samla pule border-area kiba la pyndep ïa ka kyrdan degree.
Na ka liang ka SURE kala ïoh ban ai jinghikai shaphang ki Skill Development Training haka liang ka rukom shet (food processing), shan sabon, rep tit bad ka rukom ri ngap. Kane ka jingai training ka hap hapoh ka jingïarap ka RUSA Equity Initiative Scheme. Ha ka juh ka por la ai khublei ïa u Dr. Ryan Reid Kharkongor uba la pdiang ban pynlong ïa kane ka training na ka bynta ki samla pule jong ka College.
Haba ai jingkren ha kane ka sngi ba pynlong ïa ka training ha kane ka 9 tarik Nailur, u Dr. Kharkongor ula pyntip ba ka College ha ryngkat ka Prime Meghalaya kila hikai ïa ki samla pule ba kin tip kumno ban ïeng hala ki jong ki kjat ba seng ïa ki kam la jong. Wat la ka long ka jingai training kaba lyngkot tang katto katne por, u kyrmen skhem kan long pat ka jingïarap kaba khraw eh ïa ki samla ba kin tip ban sdang ïala ka kam (business).
U Dr. H.H. Mohrmen, Secretary of SURE, haka ai jingkren ula ong kane ka seng treimon sngewbha kala dep ban ïateh bad ka Meghalaya State Skill Development Society (MSSDS) ban long kum ka lad ban ai jinghikai sha kiwei.
Ula pynpaw ruh ka jingsngewkmen ban ïatreilang bad ka Nongtalang College shi bynta na kane ka prokram. Kum ka kynhun kala dep ban ai jinghikai sha kiba bun ki khun samla halor ki bynta bapher bapher.
La pyntip ba ar ngut kiba la dep shah hikai kata u Leki Suting bad Amedora kila ïoh pdiang ïa ka Skill Icon Award na ka MSSDS bad kiwei de ki khusnam na ka Prime Meghalaya na u Myntri Rangbah ka jylla u Conrad K. Sangma dang ha une u snem bala dep.
Kyrmen skhem lyngba kane ka jingai jinghikai ha Nongtalang College kan long ka jingmyntoi ïa ki nongshah hikai, khnang ban kan long ka jingkyrkhu ïa ka lawei jong ki.
