Nongpoh, Ïaïong, 29: Tang hadien ba kawei ka Longkmie na ka shnong Jorbil Killing ha Ri Bhoi District ka la duh noh ïa la ka jingim na ka jingshah dait ksew, ka ophis ka District Medical and Health Officer ka Ri Bhoi ryngkat ka jingïatei lang bad ka Animal Husbandry and Veterinary department ka Ri Bhoi mynta ka sngi ki la pynlong syndon da ka prokram ai jinghikai ha ka shnong Jorbil Killing ban pynshai sha ki paidbah halor ka jingma kaba ktah na ka jingpang Rabies lane ka jingpang ba shah dait ksew ne ha kiwei ki mrad.
Ïa kane ka jingïalang ai jinghikai la pynlong ha ka Dorbar Hall ka Shnong Jorbil Killing ha kaba la wan ban shim bynta naduh ki nongïalam shnong, ki riew rangbah bad ki Longkmie na katei ka shnong kiba la ïoh jingmyntoi shibun eh ban shim ïa ki lad jingïada lada don ka jingshah dait ksew ne shah dait ha ki mrad ba la ju tip ha ka ktien nongwei ka jingpang Rabies.
Kum ban pynkynmaw, kane ka jinghiar ka tnad ka koit ka khiah bad na ka tnad ba dei peit ïa ki mrad ban leit pynshai sha ki paidbah halor ka jingpang Rabies, ka dei hadien ba kawei ka Longkmie ka la duh noh ïa la ka jingim na ka jingshah dait ha u ksew uba ki ri ha katei ka shnong.
Ki ar ngut ki Doctor ba kynthup ïa ka Dr. A.J Syiemlieh kum ka District Surveilance Officer na ka ophis ka DMHO bad u Dr. Aiban Phancon na ka Animal Husbandry and Veterinary Department, ki la long ki nongai jingkren kiba la pynshai sha ki paidbah halor ka jingma jong ka jingpang Rabies kaba ki donkam ban ïoh beit ïa ki jingïada.
Ka Doktor A.J Syiemlieh, ka la kham ban khia ba kane ka jingpang Rabies ka long ka jingpang kaba shyrkhei bha kaba donkam ba shim mardor ïa ki jingïada bad kane ka ktah na ka jingshah dait ksew, dait miaw, dait khnai bad kiwei ki mrad.
Kitei ki Doctor ki la kham ban khia ruh ban ïoh ïa ka jingïada donkam ban ai injek ïa ki jingri kaba ki ri kum ki ksew bad ki miaw bad donkam ruh ban don ka jingïatrei lang na baroh ki liang, namar kane ka jingpang ka long ka jingpang kaba don jingma bha bad donkam ban shim tang kita ki lad jingïada na ki jaka ai jingsumar ka sorkar, ki la bynrap.
