Nongpoh, Ïaiong 05: Kum shibibynta ban ai ka jinghikai ïaki paidbah ba kim dei ban syier lane khih khohreh haka por ba wan u jumai bad ka jingklang ka ding ka State Disaster Management Authority ryngkat ka jingïatreilang bad ka District Disaster Management Authority, Ri-Bhoi haka jingïatreilang bad ka ophis jong u Block Development Officer Umsning C&RD Block kan pynlong ïaka Mock Drill halor u jumai bad ka ding ha Lum Roman haka 8 tarik ïaiong naduh ka por 10:30 mynstep.
Katei ka prokram kan long ruh kum ka jinghikai paidbah ba kumno ki dei ban leh haka por ba khih u jumai bad haba klang ka ding ba kim dei ban khih khohreh lane lamwir hynrei ki dei ban long kiba jai jai naka bynta ban lait na kino kino ki jingjia ba sngewsih khamtam ban ïarap ruh ïakiba ngat ha katei ka jingjia.
Kumba naka por shaka por la sakhi ruh ba ki paidbah ki ju khih khohreh bad kulmar jingmut haba wan ki jinglynshop jong ka mariang khamtaam u jumai da kaba mareh bad lyniar ruh ba kane ka wanrah pynban ka jingma ïaki paidbah ba bun ba lang, hynrei ba kin long kiba la khreh lypa bad dei ban tip kumno ban pynkhreh haba wan kum kitei ki jingjia, lyngba kum kitei ki jinghikai.
Naka liang ka SDMA kala khot bad wer ruh ïaki paidbah ban ïawan ha katei ka sngi ba kin tip bad iohi kumno ba dei ban leh haka por ba wan ka jingshah lynshop haka bor mariang kum u jumai bad ka ding khnang ban lait na kino kino ki jingjia ba sngewih bad kum ki paidbah kim dei ban khohreh namar katei ka dei ka jinghikai ban pynkhreh naka bynta ki jinglynshop mariang.
