Hikai ka ophis BDO Mawkyrwat ban ïarap haba jia ki jingjulor na u jumai

Mawkyrwat, Naiwieng 28: Kum shibynta ka jingpynkhreh lada wan ka jingkhynñiuh jumai, ka ophis jong u Block Development Officer jong ka Mawkyrwat C&RD Block ha ka sngi Palei ka pynlong ïa ka Block Level Disaster Mock Drill ha Phyllaw ka ophis treikam ha Mawkyrwat, South West Khasi Hills District.
Ha kane ka Block Level Disaster Mock Drill, ka ophis ka la pyntreikam ïa ka kynhun ïada lada wan jingjia ka jingkynñiuh u jumai kata naduh ka Incident Incident Command Post (ICP) bad ka Planning Section Chief kaba la khlieh hi da u bah I. Lawrynïang, MCS, Block Development Officer ka Mawkyrwat C&RD Block, South West Khasi Hills District ha ryngkat u Dr. E.S. Langshiang, District Disaster Management Officer, South West Khasi Hills District.
Ym tang kata la buh ruh ïa ka Staging Area (SA), ka Medical Aid Post (MAP), ka Relief Camp Manager (RCM), ka Operation Section Chief (OSC) bad kiwei de kiba dei ha ka bynta jong ka jingïarap lada wan u jumai. Kiba la ïa shim bynta ha kane ka Mock Drill ki long naduh ki ophisar na ki tnad treikam bapher bapher, ki nongtrei, ki pulit ba kynthup ruh na ka Fire & Emergency Services, na ka tnad ka koit ka khiah, bad ki samla pule na ka Sngap Syiem College, Mawkyrwat.