Saw snem shiteng mynta ba kane ka Sorkar MDA ka la synshar hapoh ka jingïalam jong ka party NPP, ki paidbah ki ïohi bad ïoh mad lut nadong shadong ïa ki buit treikam (policy) jong ka. Ki paidbah ki la ïa tip bha mynta, la kane ka Sorkar ka ïalam ïa ka jinghikai kaba dei ne kaba bha (good moral lesson) ne ka ïalam pynban sha ka raibi kaba sniew (bad precedence).
Ki paidbah ki long kiba kham stad ban bishar ban ïa kaba shu kam ne ïaroh hi da lade ïa lade kumba kam kine ki nongïalam jong kane ka Sorkar MDA. Kiba pynroh ïa lade da lade dei tang ki kalbut ne tang ki riewsarong ki riew kyr-eit hakhmat ka pyrthei. Lada kiwei ki ïaroh ïa phi, kata te ka dei, hynrei ban shu ïaroh hi da lade ïa lade kumba leh kine ki nongïalam kane ka Sorkar MDA ka paw biej ei hakhmat ka pyrthei.
Bun ki paidbah sharum shaneng,u kamon u kadiang (lait noh kito kiba la bam mluh na ki nongïalam kane ka Sorkar) ki ïa pynpaw ïa ka jingbym sngewtynnad ïa ka jingleh ne ka rukom treikam jong kane ka Sorkar. Ka jingmlien jong ka Sorkar ban kloi da ka ktien ban kular hynrei khlem pat ïohi kam eiei ka la pyndiaw ïa kiba bun ki paidbah. Kane ka Sorkar ka long thik kumba ki la leit tyrwa bniat hati lypa ha iew haba u Hati pat u dang don ha khlaw. Ban shu leh kamkai eh kat ka kam ïap kam im u paidbah ka la long ym tang ka jingïalam bakla (misled) ïa ki longdien man dien hynrei ka raibi ba sniew tam (bad precedence) ha ka histori jong ka Jylla.
Ki longdien ki donkam ïa ki nongïalam ba shisha, kiba hok, kiba ïohi jngai bad kiba len shisha ïa lade (self sacrifice) na ka bynta ka jingmyntoi jong ka lawei u paidbah ba bun. Ki dei ban long ruh kum ki nongmuna kiba bha ha ka ktien ka thylliej,ka akor ka burom haduh ka kam ka jam ban ïa kaba shu pynbudnam ei ïa lade ha ka histori jong ki pateng ki ban sa wan.
Kane ka Sorkar MDA ka ladep kam lypa ruh ba ka la lah ban leh ïa bun ki kam ïa kiba kiwei kim lah satia ban leh. Ka ILP jong ki sengbhalang, ka Ktien Khasi ha ka Khyrnit Baphra, ka jingpynkynriah ïa ki Harijan na Them Iewmawlong, ki jingkop sop ïa ka jingstad ban pynbeit ïa u pud u sam bad ka Assam, kine baroh ha ka jingshisha ki dang sahkut lydui ha suiñ tad haduh ba kan da wan pat da kawei ka Sorkar thymmai hadien ka Election 2023.
Yn nai ïakren ïa ki kam khaïi dewïong be-aiñ ba ki len doh ïap doh im, ki jait ba ki jait jingtohkit bapher bapher ba ki la thung tang ban pynbiej ne pynhun ïa ki paidbah bapli. Kine jingtokit kim poi shano shano ruh. Ïa ka jingtohkit kaba hok bad kaba shisha, ki buhrieh khop khop kumba set ha tyndong, hynrei ïa kibym hun pat u paidbah, ïa kata ki leh kput haduh ban da biang da biang. Ki kham pyrkhat pynban ïa ki kam ki ban ktah ïa ka lawei ka ri bad ka jaitbynriew tang ban ïoh kamai pisa jem kum ka kam ïa khalai (Casino), ban ïa kaba pynleit jingmut ïa ka lawei ka thoh ka pule jong ki khynnah.
Kim don kata ka jingpyrkhat jngai ban ïapeiñ shwa ban ïohnong pat hadien (no risk no gain).
Sa kawei pat kaba ki paidbah ki i thamula ïa kine ki nongïalam kane ka Sorkar MDA ka long ka jingbym ler jong ki ba kin kren paidbah ha manla ki jingïalang paidbah. Ki kren kulmar kat shaba lap ba shem la kumba kren ki riew paidbah pynban.
Kim don ki nia ki ktien kiba shongkun kum ki nongïalam ba shisha hynrei ki kren pynban da ki ktien kai bad ki ktien biria suda. Kum kine ki jait nongïalam paidbah kim dei satia kiba la kha ïa ki kum ki nongïalam hynrei ki dei kiba shu thaw nongïalam hi (the leaders were born but not made).
Kum kine ki nongïalam ki kwah biang hirhir ba u paidbah hana un jied biang khnang ban ïoh ïalam biang ïa ki paidbah bad ïa ka Jylla sha khlaw hadien ka Election 2023. Ngin thaw hi ïa ka jingjot la ka jong ka jingleh wat tei pop pat ïa kiwei.
