Hiar u MLA bad ki bor district sha Maikhuli, hadien ka jingïakynad ha khappud

Nongpoh, Nailar 20: Hadien 2 sngi bala mih ka jingïapynibor hapdeng ki briew na Assam bad naka jylla Meghalaya, naka jingpynkhyllem ki paidbah ka Maikhuli ïaki post eletrik bala wan thung da ka Assam State Electricity Board, u MLA ka Jirang u Bah Sosthenes Sohtun lem bad ki bor district ka Ri-Bhoi hapoh ka jingïalam u Abhilash Baranwal Deputy Commissioner bad VS Rathore Senior Superintendent of Police ka Ri-Bhoi lem bad ki majistor mynta ka sngi kila hiar sha ka thaiñ Maikhuli ban ïakynduh bad ki paidbah bad ban iohsngew ïaka sur jong ki hadien katei ka jingjia bad khamtam ban kyntu ïaki paidbah ban long jai jai bad ban nym pynmih kano kano ka huri hura kaba ktah ïaka shongsuk shongsaiñ.
Naka liang ki paidbah ba bun ba lang na katei ka thaiñ kila buh ka jingkyrpad ïa u MLA bad kumjuh ruh ki bor district ban shimkhia ïa katei ka kam bad ka jingeh kaba ki paidbah ki ïakynduh ha katei ka thaiñ khamtam ban pynsngew sha ka sorkar ban weng ïa katei ka jingeh.
Kum u MLA ha katei ka jingleit jong u sha katei ka thaiñ u la pynrem jur ïaka jingshah patrong jong ka longkmie bad kyrpad ruh ban ujor da ka ejahar bad ban kem ïaki briew ba donkti, bad haka juh ka por u la kyntu ïaki paidbah ban pynneh ïaka shongsuk shongsaiñ ym ban shim ïaka aiñ hala ka jong ka kiti hynrei ban pyntip sha ki pulit bad ki bor district haba don kano kano ka jingjia.
Shuh shuh u la kyrpad ruh ïa u DC ka Ri-Bhoi ban ujor da ka jingthoh sha ka sorkar ha kaba ïadei bad ka jingïakynad haka thaiñ Maikhuli kaba dei ka shnong khappud bad ka Assam bad naka liang jong u kum u MLA un sa shimkhia ban leh lakajong ka kam.
Nalorkata kum u MLA u la kular ruh ban shimkhia halor katei ka mat bad wat ban ïalam ïaki longkmie naka shnong Maikhuli ban leit kynduh markhmat bad u Myntri Rangbah ka jylla naka bynta ban pynpaw ïaki jingeh jong ki bad khamtam ba ka sorkar kan weng mardor ïa kitei ki jingeh ba ki paidbah ki ïakynduh.