Hiar u Joint Secretary ka BJP na Delhi sha Mukroh ban leit sngewlem ïa ki lanot

Jowai, Naiwieng 27: U Joint Secretary National Baratiya Janata Party (BJP) na nongbah Delhi uba dei peit ïa ka thaiñ Shathei lam mihngi, u Rituraj Sinha mynta ka sngi da ka jingbthah jong u Myntri Rangbah ka Ri u Narendra Modi bad u National President u J.P Nadda ula leit hiar sha ka shnong Mukroh West Jaiñtia Hills District ban pynpaw ka jingsngewlem na ka liang ka Party ïa kito ki longïing kiba la duh noh ïa kiba ieit ba thoiñ jong ki na ka jingshah siat ïap ha ki pulit Assam kaba la jia ha ka 22 tarik mynta u bnai.
Ha kane ka jingleit hiar u Rituraj Sinha la synran lang da u MLA bah A.L Hek, u myntri sorkar bah Sanbor Shullai, u President ka BJP jong ka jylla bah Ernest Mawrie, u ma Lakhon Biam u ban ïakhun ïa ka MLA na 3 Raliang Constituency na ka BJP bad kiwei kiwei de ha ka jingdonlang u MLA ka thaiñ u ma Nujorki Sungoh.
Na ka liang u Rituraj Singha ula kular hakhmat ki longïing ba na ka liang ka BJP hapoh ka jingïalam jong u ha ryngkat ki nongïalam jong ka Party napoh ka jylla kin sa leit ban ïakynduh mar mar ïa u Myntri Rangbah jong ka jylla Assam u Himanta Biswa Sarma na ka bynta ban dawa ïa ka hok jong ki san ngut kiba la shah siat ïap ha ka kti ki pulit Assam bad ban dawa pynshitom ïa kito kiba donkti ha kane ka jingsiat ïap.
U Sinha ula pynpaw ruh na ka liang ka Party kan sa ai jingthoh sha u Myntri Rangbah ka jylla u Conrad K, Sangma ban dawa pynïoh kam sorkar iwei I dkhot jong ka iing jong kito kiba la khlad noh. Ula kyntu ruh ia u MLA ka thaiñ u ma Nujorki Sungoh ban kyrshanlang ïa kane ka jingthmu khnang ba ki traiïing kin ïoh ka jingkyrshan ban pyndap pynbiang ia ka jingdonkam jong ka iing ka sem.
Na ka liang jong ki longïing ruh haba kren sha u Sinha kila buh ka jingkyntu ïa une u heh nongïalam ka BJP ba un shimkhia ban pynïoh kloi ïa ka hok jong ki.
Ha kane ka juh ka sngi na ka liang u Party BJP naduh ka National haduh ka State BJP ki la ai jingiarap da ka song pisa sha baroh kitei ki san tylli ki longïing kiba la ïakynduh ia kane ka jingjia ba sngewsih.
Kham hashwa jong ka jingwan poi u Join Secretary National ka Baratiya Janata Party (BJP) u Rituraj Sinha, na ka liang jong u President jong ka BJP Meghalaya bah Ernest Mawrie ryngkat bad u bah Sanbor Shullai lem bad ki nongïalam shnong kila leit jurip ïa ka jaka ba la jia kane ka jingshah siat bad kila leit ruh shaduh ka jaka ba don ka ïing Forest jong ka Assam.
Haba la poi ha kane ka jaka na ka liang ki bor District Karbi Anglong hadien ba kila ïoh jingtip, kila wan poi ha kane ka jaka ba la mihkhmat da u Addl. SP (Crime) jong ka Hamren PS u Nayanmoni Barman. Ha ka jingjurip na ka liang kine ki nongialam ka BJP Meghalaya kila pynpaw ba kane ka jaka ka dang hap hapoh u pud u sam jong ka jylla Meghalaya ryngkat ki sakhi satar kum ka jingshna ïa u surok da ka sorkar Meghalaya, ka jingdon jong ki kot ki sla jong ki trai shnong kaba kila ïoh napoh ka JHADC bad ki jaka rep jaka riang jong ki trai shnong.
Kitei ki nongïalam ka BJP kila pynpaw ba ka sorkar Assam kala wan kyntur pud jubor shapoh u pud jong ka jylla Meghalaya, kumta kila bthah ïa ki pulit Assam kiba don ha katei ka jaka ba kim dei ban wan thaw klumar shapoh u pud u sam ka jylla bad ki la bthah ïa ki pulit Assam ba kum kane ka jingjia kam dei shuh ban jia nangne shakhmat.