Hiar u heh pulit ka jylla sha Block II, ïakynduh bad ki heh pulit jong ka Assam ban pynneh ïaka shongsuk

Nongpoh, Nohprah 15: U heh pulit jong ka jylla Meghalaya u Dr. LR Bishnoi DGP, mynta ka sngi u la leit ban jurip hi dalade ïaka shnong Umsaw Lumdorbar haka thaiñ Block II ban wad bñiah ïaka jingshisha halor ka jingwan ker sainar jong ka Assam ha katei ka shnong kaba ki paidbah da ka jingbitar kila pynpra noh ïa katei ka jingker bad kumba la ioh jingtip ruh ba ki pulit Assam ki dang bteng ban thwet ïakiba donkti pynpra.
Katkum ka jingtip bala ioh lum naka liang u Dr. LR Bishnoi u la leit ruh ban ïakynduh ïaki heh pulit jong ka Assam sha West Karbi Anglong naka bynta ban ïa mir jingmut ban pynneh ïaka shongsuk shongsaiñ ha katei ka thaiñ naduh u Inspector General (Law & Order) ka Assam u PK Bhuyan, u DIG (Central Range) ka Assam u Satyaraj Hajarika, u Deputy Commissioner ka West Karbi Anglong u Krishna Barua ha ka jingïadonlang u Superintendent of Police ka Ri-Bhoi u Giri Prasad, u SP ka WKA u Indranil Barua bad u DFO ka Hamren u R Engti bad kiwei kiwei.
Kine ki Heh Pulit kila ïashong ruh da ka jingïalang ha Beat Office ka Umjaknieh Forest Range kaba hap hapoh ka Baithalangso Police Station, West Karbi Anglong bad ha katei ka jingïalang la ban jur ruh halor ka jingdonkam ban pynneh ïaka suk ka saiñ jong ki paidbah ba shong ba sah ha katei ka thaiñ katba ka jingpynbeit pud ka dang ïaid hapdeng ka sorkar Meghalaya bad Assam, bad hadien katei naka liang u DGP bad kiwei ki heh pulit kila pynlong ruh ka jingkynduh lang bad ki nongïalam shnong jong ka Raid Nongtung ha Mawlasnai ban ïakren halor kumno ban pynneh ïaka shongsuk shongsaiñ ha katei ka thaiñ.