Hiar u Dy. CM sha Lapangap, kular ban ym ieh khunswet ka Sorkar ïa ki Khasi Pnar

Jowai, Naitung, 08: U Symbud Myntri Rangbah ka Sorkar Jylla Bah Sniawbhalang Dhar uba long ruh u u Chairman jong ka Regional Committee na ka bynta ka West Jaiñtia Hills ha ka sngi Baar u la hiar dalade sha ka shnong Lapangap, West Jaiñtia Hills, hadien ba la mih ki jingïakajia pud dang ha une u bnai ba ladep hapdeng ki Khasi Pnar bad ki Karbi.

Ïa u Bah Dhar la synran lang da u Deputy Commissioner ka West Jaiñtia Hills u Abhinav Kumar Singh, u Superintend of Police u Jagpal Singh Dhanoa, u Chief Executive Member jong ka Jaiñtia Hills Autonomous District Council u Bah Thombor Shiwat, ki MDC, ki ophisar, u Waheh Shnong ka Lapangap Bah Deimonmi Lyngdoh ryngkat k jingdonlang jong ki paidbah nongshong shnong.

U Bah Dhar ha ka jingkren sha ki paidbah ka shnong Lapangap, ula kular ba ka Sorkar kan ym iehnoh khunswet hynrei kan  ai jingïada ba pura ïa ki paidbah nongshong shnong.

‘Wat tieng ngan trei shitom kum u MLA ka thaiñ ban wanrah ka jingsuk bad ban pynïoh ïa u pud u sam ba pura,” ong u Bah Dhar.

U la kular ba ki Pulit kiba la buh ban pahara ha ka shnong Lapangap ym kynriah shuh katba ka shnong Lapangap kam pat ai ktien eiei.  “Lada ïoh lad ngin nang pynbun shuh shuh ïa ki Pulit ha ka shnong Lapangap,” u la ong.

U la ong kane ka jingwan jong u ha kane ka shnong ka long ba u don ka jingkitkhlieh ïa ki nongshong shnong ba kim dei ban shah lehbeiñ ha kiwei pat.

“Ka kam ïakajia pud ka ju jia ha kino kino ki por.  Nga kyntu ïa ki paidbah nongshong shnong ba kin pynbiang noh ïa ki kot ki sla ki jaka puta jong ki khnang ban pynsuk ïa ka Committee,” u la bynrap.

“Ha ka kam pynbeit pud kam dei ban duh ïa ki mynsiem briew da ka jingïa umsnam bad mynta ka sngi nga la wan hiar khnang sha kane ka jaka ban ïoh jingtip ïa ka jingeh jong ki paidbah ha Lapangap,” la pynpaw shuh shuh u Bah Dhar.

“Ki jingïakajia kiba la jia dang ha kine ki sngi ba ladep, kaba nyngkong, ka dei na ka daw ka jingwan thung tynrai dieng jong ka Assam ha u lum Umchyrngan, Lapangap. Kaba ar, ka long ka jingbym ïohlad shuh ki nongrep ban leit rep sha ki pynthor,” u la ong bad bynrap, “ha ka por janmiet tang shu poi ha Shillong ngan sa leit ïakren ïa kine ki mat bad u Myntri Rangbah ka jylla bad nga kyntu ïa phi ki paidbah ban long kiba ïaishah.”

‘Ïa ka kam pud kam sam ka dei ka kamram jong ka Sorkar Jylla ban pynbeit ym dei da u paidbah.  Kumta ka Sorkar kan ïaleh ban pynbeit kloi ïa kane ka kam. Ngi ladep bthah ïa ki bor synshar District ban kynthup ïa ki shnong na Khanduli, Psiar ter ter kiba don hapoh khappud hapoh 45 kilomiter shapoh bad 45 kilomiter shaneng na ka bynta ban wanrah sha ka Sorkar Jylla ban ïoh ïakren bad ka Assam,” la pyntip u Bah Dhar.

U Bah Dhar u la pynshai ïa ka kam pynbeit pud na ka bynta ka wat banyngkong  ladep ban leh ïa kaba donkam da kaba thung ïa ki mawpud ba pura bad kaba sah mynta ka dei ka wat kaba ar da kaba pynpaw ba kane ka dei ka kam kaba sahteng da ki phew snem bad kam long kaba suk ïa ka sorkar ban pynbeit kloi ïa kane ka kam.