Nongstoiñ, Naitung 16: U Dr. R. J. Syngkon u dkhot ba don burom jong ka Ïingdorbar Thaw Aiñ (Lok Sabha) na Shillong, ha ka sngi balang u la hiar sha Nongstoiñ ban pynïaid ïa ka jingïalang jong ka District Development Coordination and Monitoring Committee (DISHA), kaba thmu ban bishar bniah ïa ka jingpyntreikam ïa ki skhim bad ki prokram bapher bapher, ba la kyrshan da ka Sorkar Pdeng hapoh ka West Khasi Hills District.
Ïa kane ka jingïalang la pynlong ha Conference Hall jong ka ophis jong ka Deputy Commissioner Nongstoiñ, ha kaba u bah Garod L. N. S. Dykes, IAS, Deputy Commissioner, u la pdiang burom ïa u MP bad kiwei ki riew rangbah. Ha kane ka jingïalang la ïohi ïa ka jingïashim bynta kaba radbah na ki nongmihkhmat ba kongsan ba la jied bad ki heh ophisar jong ka District.
Ha kane ka jingïalang, la ai ïa ki jingkren kiba bniah halor ka jinglong jingman bad ka jingïaid shaphrang jong ki flagship scheme ba kongsan, kynthup ïa ka PMGSY, MGNREGA, Jal Jeevan Mission, PMAY-G, POSHAN Abhiyaan, NRLM, bad kiwei kiwei ki prokram ai jingmyntoi.
Katba na ka liang U Dr. Syngkon u la ïakren bha bad ki heh sorkar ban sngewthuh ïa ki jingeh kiba dang ïaid shakhmat, ki jingjop, bad ki bynta kiba kongsan kiba donkam ban ïarap.
Ka jingialang ka la pynkut ha ka jingmut kaba bha ryngkat bad ka jingkut jingmut lang ban pynbha ïa ka jingïatreilang hapdeng ki tnad, ban pynkhlaiñ ïa ki rukom peitngor, bad ban bteng ban buh hakhmat eh ïa ka roi ka par kaba kynthup lang ïa ki paidbah ka West Khasi Hills.
Napdeng kiba la don lang ki long U Bah G. Momin, MLA ka Rambrai Jyrngam Konstitwensi, U Bah Gabriel Wahlang, MLA ka Nongstoin Konstitwensi, U Dr. J. Ïawphniaw u MDC jong ka Nongstoiñ, U Bah H.K. Thabah, u Additional Deputy Commissioner u ba la pynïaid ïa kane ka jingïalang, U Bah V. Swer, ADC, U Bah C.P Mawkon ADC, U Bah R.Kharkongor, BDO Mawshynrut, U Bah E.Lyngdoh u BDO Nongstoiñ, ki EAC bad kiwei pat ki ophisar na ki tnad bapher bapher.
