Shillong, Jylliew 27 : U Myntri Rangbah ka jylla, Conrad K Sangma uba dei ruh ha kajuh ka por u National President jong ka National People’s Party (NPP) hynne ka sngi Nyngkong u la hiar sha Mylliem ban kynduh ïa ki nongkitkam jong ka NPP Mylliem Block na ka bynta ban pynkhreh ïa ka elekshon MLA na katei ka constituency.
Ïa ki nongkitkam jong ka NPP Mylliem Block, u Myntri Rangbah u la kynduh kyrpang ïa ki ha ka ophis treikam ba thymmai jong ka party kaba don ha Nongkseh, Laimer.
Haba kren bad ki lad pathai khubor hadien kane, u Myntri Rangbah u la kubur ba ka party ka pynkhreh ban aireng ha baroh ki constituency jong ka jylla bad ka Mylliem kan dei kawei na ki. Hynrei, haba jubab halor u kyrtong ba ka party kan sei na Mylliem, u Conrad u la ong, “Ïa mynta hi ngim pat kwah ban ïathuh shaphang u kyrtong ka por kan sa poi ba ngin pynbna.”
Kumba long haduh mynta hi, ka NPP watla kam pat pynbna uei u kyrtong ba kan sei ha u 2023 pynban ka jingïakren sharum shaneng ka la ïaid bha ba u MLA ba mynta jong ka PDF ba dei ruh u Myntri ha ka sorkar jylla, Bah Hamlet Dohling un mih ban ïakhun na katei ka party.
Wat na ka liang ki heh NPP ruh ki la kubur ïa kane. “Tangba ngim pat nud ban pyntikna namar haduh mynta ka dang ïaid ka jingïakren,” ki la ong.
