Hiar thma ki Hati khlaw ha ka shnong Nong-i-jngai, julor 14 tylli ki ïing nongrep

Mawkyrwat, ‘Naitung, 12: Kawei ka jingjia ha kine ki khyndiat sngi ha kaba ka la don ka jingshah hiar thma jong ki nongshong shnong bad ki jaka rep jong ka dong ka thaiñ Nongnah ha ki mrad khlaw ba la tip kum ki hati khlaw ka lah poi sha ka 3 sien kynthih, kane ka jingshah hiar thma ha kine ki mrad ka la buh jingma shi katdei ïa ki paidbah jong kane ka dong ka thaiñ.
Katkum ka tyllong khubor la ong ba watla ki paidbah jong kane ka dong ka thaiñ ki la ju pyntip sha ka tnad ba dei peit ïa ki mrad khlaw kum ka wildlife ba kin leh ei ei ne beh noh ïa kine ki mrad namar ka la buh jingma shi katdei ïa ki nongrep nongriang hynrei haduh mynta kane ka tnad ba dei khmih ia ki mrad kam shem leh ei ei ruh em.
La ong ruh ba ha ka 3 tarik mynta u bnai kine ki hati khlaw ki la wan thombor biang sa ïa 14 tylli ki longïing jong ki nongrep ha ka shnong Nong-i-jngai, South West Khasi Hills District haduh ba ki ïing ki sem ki la pra haba wat tang ïa ia ka pliang ja ban bam kim ïoh shuh ban tam.
Hynrei la ïathuh ba don bok ba ha kane ka jingjia ka la jia ha ka por ba ki briew ha kane ka shnong kim shem la don bad kumta ym shem don kano kano ka jingmynsaw.
Namarkata, halor kane ka jingjia ki paidbah jong kane ka dong ka thaiñ ki la kyntu ïa ka tnad wildlife ba ki dei ban leh ei ei noh mardor halor kane ka bynta ban wan beh ne leh ei ei ïa kine ki hati bad lada ka tnad ba dei khmih ïa ki mrad khlaw, na ka liang ki paidbah jong kane ka dong ka thaiñ kin shim noh ïa ka aiñ ha ka kti ban beh ïa kine ki mrad namar kumba long mynta ki nongrep kim nud shuh ban leit trei sha ki bri ki bsah tang namar ka jingdon kine ki hati khlaw.