Shillong, Nailur, 24: U MDC jong ka Voice of the People Party (VPP) na Langkyrdem-Laitkroh Constituency u Bah Shemborlang Rynjah ha ka sngi Balang u la hiar shuki noh kum u Chief Executive Member (CEM) jong ka Khasi Hills Autonomous District Council (KHADC).
Kane ka la jia tang hadien ba ka Executive Committee ba la ïalam da ka VPP ka la kynjoh ïa ka jingtreikam kaba hynñiew bnai.
“Da kane ka shithi nga pyntip ïa phi ba nga la hiar shuki kum u Chief Executive Member jong ka KHADC ha kane ka sngi ha ka 24 tarik, Nailur, 2025. Hadien ba la ïasyllok sani bha, nga la shim ïa ka rai namar ka jingbym don jong nga hapdeng ka met kaba koit ba khiah, na ka bynta ka bha ka miat jong nga bad kumjuh ruh na ka bynta ka ophis nga la rai ban hiar shuki,” la pynpaw u Bah Rynjah ha ka shithi iehnohkam ba la aiti ha u Chairman ka KHADC u Bah Strong Pillar Kharjana.
U EM ka KHADC u Bah Powell Sohkhlet uba long ruh u nongaiktien jong ka VPP u la pyntip ba u Bah Rynjah u la hiar shuki na ka daw ka jingbym don ïa ka met kaba koit ba khiah.
“Na ka liang ki MDC ka VPP, wat lada ngim sngewlah pdiang ïa kane ka jinghiar shuki jong i, hynrei haba ngi pyrkhat pat ïa ka koit ka khiah, ngi la pdiang bad burom ïa kane ka rai jong i ryngkat ka jingduwai bad kitbok kitrwiang ba in ïoh noh ïa ka met ba koit ba khiah,” ong u Bah Sohkhlet.
“Ka jingïalang jong ka Parliamentary Party jong ka VPP ha KHADC, ka shaniah beit ha ka party ban leh ïa ki kam baroh khamtam ban jied ïa u nongïalam ba thymmai jong ka party ne ïa u CEM ha KHADC,” u la ong shuh shuh bad bynrap, “ngi kyrpad ruh ïa ki paidbah ban kynmaw ïa i Bah Shemborlang Rynjah ha ki jingduwai bad kumjuh ruh ïa ka ïing ka sem jong i.”
