Shillong, Rymphang 6 : Ka Meghalaya Pradesh Congress Committee (MPCC) ka dawa ïa U Myntri Rangbah ka jylla u Conrad K Sangma ba un hiar shuki mardor kum u Myntri ba dei ïa ki kam tih par ne Mines bad ha kajuh ka por ban thung da ka jingtohkit ba laitluid halor ka jingjia ha Thangsko, East Jaintia Hills kaba la wanrah ka jingiap ïa 25 ngut ki mynsiem briew.
“ Ngi dawa ruh ba ki bor synshar kiba halor duh ki dei ban shim ka jingkitkhlieh ym dei ban kynnoh tang ha kiba rit ba ria kumta na kata ka daw ngi dawa ban hiar shuki mardor u Myntri Rangbah kum u Myntri ki kam tih par (Mines) kum ka jingshim ïa ka jingbah khlieh halor kane ka jingjia bad ban thung ruh ïa ka jingtohkit ba laitluid” ong ka kyrdoh na u Secretary ka MPCC u Sanjay Das.
Ka Congress ka dawa ruh ba ka jingtohkit ka dei ban long da ki bor ka ïing bishar lane ban peit bad pynïaid da ka ïing bishar halor kane ka jingtohkit ïa kine ki jingtih dewiong beaiñ ha East Jaintia Hills bad ha kiwei kiwei ki jaka jongka jylla.
La dawa ruh ban pynshitom kat kumka aiñ ia ki bor synshar kiba leh klet bad ki bym khein snep ban khang ïa kine ki kam tih bad khaïi dewiong beaiñ. Ka Conress ka kynnoh ba kane ka jingiap ka jia dei namar ka jingkheiñ sting palat ki bor synshar district.
Kine ki nongbylla kim shym iap jia ryngkhat hynrei ka dei ka kam kaba la pyntrei bha tangba na ka daw ba khlem pyntreikam ïa ki bor ka aiñ ban khang lad ïa ki kumta la jia kane ka jingjia, ong biang ka kyrwoh.
La kynnoh ruh ïa ka jingkheiñ sting jongka sorkar ban pyntreikam ïa ki kyndon aiñ ba pyrkhing wat hadien ba la bthah bad hukum da ki ïing bishar ruh ban khanglad ia kane ka jingtih dewiong beaiñ.
Ka Party ka dawa ruh ba ka sorkar ka dei ban siew bai lutksan sha ki long ïing longsem jong kine kiba khlad noh halor kane ka jingjia.
