Jowai, Nailur 06 : Ka Hynñiewtrep Integrated Territorial Organisation (HITO) Jaiñtia Hills hapoh ka jingïlam u Burom Dkhar haka jingïadon lang ki nongïalam ka CEC naduh u Working President Lawyerson War bad u General Secretary WN Dkhar kila hiar sha Khliehriat haka 5 tarik u Nailur, 2025 ban kynra ïaki Trading Licence haki dukan ki bar Jylla.
Ha kane ka jingkynra la lap bun bun naki dukan bar Jylla kila don ïaki Trading Licence bad lait tang katto katne tylli ki bym don Trading Licence bad naka liang ka seng kala khang noh shisyndon ïaki dukan bym don Trading Licence bad ha kaba ïadei bad ki Labour Licence bun naki nongtrei ki kharkhana ki dukan kim don ïaki Labour Licence bad ka seng kala ai por ïaki trai dukan 15 sngi ba kin pynbiang ïa la Labour Licence bad kumjuh ruh ïa ki dukan ki bym don Trading Licence.
Shuh shuh ka seng kala kyntu ruh ïaka Jaiñtia Hills Autonomous District Council ba kam dei shuh ban ai Trading Licence haki kino kino ki kam ba ki trai ri trai muluk ki lah ban leh hi namar kumba ka long ha ki snem bala dep ba ka JHADC kala shu ai pathar ïaki Trading Licence sha ki bar jylla.
