Hiar khang tala syndon ka KSU ïaka Toll Gate ka NHAI ha Pasyih ba kuman ia ka jingdawa

Jowai, Ïaïong 11: Ka Khasi Student Union (KSU) Jowai Cicle mynta ka sngi nyngkong kala leit ban khang tala syndon ïa ka ophis treikam ka Toll Gate kaba dei ka jaka lum khajna jong ka Highways Authority of India (NHAI) kaba don ha Pasyih-Ialong bad ai lad ïa ki kali ban ïaid khlem donkam ban siew haduh ba la thoh ïa ka khubor ha por mynmiet.
Kaba pynlong ïa ka seng ban leit khang tala ïa katei ka Toll Gate ka long halor ka nongrim ba ka NHAI kam shem la sngap satia ïa ki jingdawa jong ka seng ha kine ki bnai ba la dep, kata ban maramot ïa ka surok NH-6, ban buh ïa ki Street lights, ban shna ïa ki nala um ba biang kumjuh ki lynti ïaid kjat ha ki bynta jong ka surok NH-6.
La ïathuh ba ïa kane ka shithi jingdawa ka seng kaba dep ban pynher katkum ka shithi Ref No KSU/JC/2022/12 dated 23.09.2021 kunjuh sa kawei de ka shithi kum ka jingpynkynmaw biang Ref No. KSU/JC/2022 dated 24.03.2022 sha u Project Director jong ka National Highways Autho-rity of India (NHAI), Shillong hynrei haduh mynta katei ka jingdawa kala shu sah kut khlem sei soh eiei.
Ka seng kala pynsngew ruh ba ka jingdon jong kane ka jaka lum khajan na ki kali ki mator kam don jingmyn toi satia ïa ki paidbah kiba leit ba wan na une u surok NH bad kane ka jinglum khajna kala long pynban kum ka lad kamai pisa jong ka NHAI katba ïa ki jing donkam kiba dei ban don ha ki bynta u surok la shu leh klet da ki bor ka NHAI.
U President ka KSU Jowai Circle samla Ioannis Suchiang haba ai jingkren sha ki lad pathai khubor ula ong ba kane ka jinghiar ka seng ka long hadien ka jingbym shimkhia jong ka NHAI ïa ki jingdawa, ula kren shai ba lada ka NHAI kam pat pynurlong ïa ka jingdawa haduh mynta, na ka liang ka seng ka shim ïa ka sien jam ba kam shah satia ban lum khajna ha katei ka Toll Gate tad hadud ban da pynbeit da kumwei.
Na ka liang u President ka KSU West Jaiñtia Hills District samla Laitphar Synkrem ula ong katkum ka jingtip kaba kila ïoh ba ka jingbuh ïa ki jaka lum khajna (toll gate) ki dei ban long 60 kilo miter na kawei pat ka Toll Gat, hynrei hapoh ka jylla kim don satia ïa katei ka jingjngai na kawei ka toll gate kaba don ha East Jaiñtia bad kumjuh ha Diengpasoh.
U samla Synkrem ula ong ba kane ka jingleh ka NHAI khlem da burom ïa jingdonkam u paidbah na ka liang ka seng kan ïeng skhem ba kan ym shah da lei lei ban lumkhajna na katei ka Toll Gate katba ym pat dep ban pynbiang ïa ki jingdonkam baroh.