Hiar ka WJSU bad FKJGP sha Tamabil ICP ban kynduh ïa ki nongshong dei sha bad die kwai dong

Jowai, Nailur 19: Ki nongïalam ka War Jaiñtia Student Union (WJSU) Central Body bad ka Federation of Khasi Jaiñtia & Garo People (FKJGP) War Jaiñtia hynnin ka sngi 18 tarik u Nailur kila leit hiar sha Tamabil (Integrated Check Post- ICP) ban lap ïa ki jingshisha halor ka jingjia kaba lah jia ïa ki longkmie trai shnong trai muluk kiba shongdie sha bad wai dong ha syndah ka ICP.
Ki nongïalam ka seng ki la ïa kynduh markhmat bad kitei ki longkmie ba shah kyndang ki dukan die kwai dong, ha ka jingïakren bad kitei ki longkmie la lah ban pynshisha ba kine ki nongwei shisngi kila wan leh trai ïa ka ri War Jaiñtia da kaba thombor ïa ki kynthei khynnah kiba kamai jakpoh ha syndah katei ka ICP.
La ïathuh kitei ki nongpynïaid ïa ka ICP ki dei ki nongwei ki kyndang na ka por sha ka por ïa ki longkmie ba shong die kwai dong bad wat ïa ka pisa jong kine ki longkmie ruh ki knieh bad kim pynphai shuh.
Halor kane na ka liang u President rangbah ka seng Jambok Lanong u pynpaw ba kane ka dei ka jingsdang ki bor ba sha lyndet ban ïuhroit ïa ka hok trai ri bad lada ngim ïa tylli kum ki paidbah nongshong shnong ka thaiñ wat ïa ka khaïi ka pateng hangne ruh kin knieh Suki Suki da kaba wanrah da ka briew na Dhaka bad Shillong. Ha kata ka por ki briew ka thaiñ kin long tang ki nongpeitkai bad ngin jawdud.
U President ka seng ula ai ktien ïa ki paid ka thaiñ ba ka seng ka dang shu khie thiah hadien 14 snem bad ka seng ka kloi ban shakri ïa ka thaiñ bad ki paid ka thaiñ ha kino kino ki jingeh ban ïada ïa ka thaiñ bad ki briew jong ka. La kyntu ïa ki paidbah ki lah ban wan ud sha ka seng ha kano kano ka jingeh ba ki ïakynduh naduh kiba duk bad ba riewspah ki long ki juh ha khmat ka seng.
U General Secretary ka seng Everest Langstang u lah pynrem jur ïa ki nongleh thombor ki nongpynïaid ka ICP ïa kitei ki nongdie waidong bad nongdie sha ha syndah ka ICP. Kum kine ki nongpynïaid ka ICP kim don hok ban don hapoh kane ka thaiñi.
Ka seng ha ryngkat kiwei de ki seng kiba ïahap jingmut lang ha ka sngi Saitjaiñ kin pynlong ka jingshong meeting ban shim ïa ka rai ban leh da kaba tyngeh ïa kiba don kti ban leh ïa kane ka kam pohjait ïa ka Burom ka thaiñ War Jaiñtia.
U la ong kine ki longkmie War Jaiñtia ba dei ki trai shnong balei une u nongpynïaid ka ICP u kheiñ ïa ki kum ki criminal/terrorist bad knieh ïa ki tiar ki tar jong ki bad wat ïa ka pisa ruh khlem da pynphai.
Ka jingknieh jubor ïa ka pisa ki riew paidbah ka long kaba beaiñ, la ong ruh ba kaei ba kine ki longkmie ki leh, ki pynthut ka leit ka wan kiba rung ba mih na Bangladesh sha India ne na India sha Bangladesh, ki pynthut ïa ka business transaction hapdeng ka India bad Bangladesh ne ki pynthut ïa ka ïaid ka mih ki kali, la buh jingkylli ka seng.
Utei u General Secretary ka seng Everest Langstang ula pyntip sha kitei ki long kmie ba shah thombor ba shen kin ïoh biang ban die sha bad wai dong kumba ki ju die.
Ka WJSU kaba dawa naduh ki snem 2000 ter ter ban upgrade ïa ka Land Custom Station sha ka Special Economic Zone ne Dry Port bad ka sorkar India ka ai tang ka integrated ban pynbha ïa ka business hapdeng kine ki artylli ki ri.
Ha kane ka jingleit jurip ïa ka jingleh kam pohjait u nongpynïaid ka ICP u khar poi ei sha kane ka thaiñ, na ka liang u President ka seng FKJGP War Jaiñtia Circle u bah Bahshlur Mukhim, ula maham ba ki poi ei kim don hok ban leh donbor ïa ki briew ka thaiñ War Jaiñtia bad sha kiwei kiwei ki bynta ka ri.