Shillong, Nailar 14 : Ki heh ka World Health Organisation na ka Jylla ki la hiar mynta sha Tikrikilla, West Garo ban hiar tohkit bniah halor ka jingphriang ki khubor ba ka jingpang Polio ka la khie im biang ha ka Jylla.
Haba kren bad ki lad pathai khubor, ka Director MCH&FW Dr. JS Momin bad kumjuh ka Jt. Director MCH&FW Dr. B Mawlong ki la ïathuh ba kane ka jingjia ka la mih hadien ba uwei u khynnah rit ba dang 2.5 snem ka rta u la leit shah sumar sha Goalpara Civil Hospital namar ka jingshitom.
La ïathuh ruh ba ka shim ar tylli ki nongmuna (samples) na utri u heprit ban phah test sha ka laboratory kaba don ha Kolkata bad ruh sha Mumbai ban wad bniah halor katei ka jingpang ba ïoh utei u heprit.
“Katba ngim pat ïoh ïa ka kaiphod kaba pura na kitei ki laboratory ngim pat lah ban ong ei ei la utei u heprit u shitom na ka jingpang Polio ne na kiwei pat ki jait jingpang,” bynrap sa ka Dr. B Mawlong.
Ha kajuh ka por ka ïathuh ba ka kynhun jong ka WHO ki la leit ban lum ïa ki sample jong u bad ruh ïa ki nongshong shnong na ka bynta ban wad bniah shuh shuh.
Kane ka jingjia ka la pynlong ruh ïa ki state surveillance team na Bongaigaon, na Barpeta kumjuh ka kynhun na Shillong bad WHO kumjuh ka kynhun na ka tnad ka Koit ka Khiah na West Garo Hills ki la don mynta ha katei ka thaiñ ban pynlong ka jingwad bniah.
Na ka liang ka tnad ka Koit ka Khiah ki la ïathuh ba ri India kumjuh ka Meghalaya ki la lait na ka jingpang Polio mynta la palat shiphew snem. Dei na kane ka daw ba kum ka tnad ki shimkhia bad phah tes bad wad bniah halor katei ka jingjia ha Tikrikilla.
