Shillong, Nailur 21 : Ka Mawkhar SC ka la hiar sha ka kyrdan ïalehkai First Division hadien ba ka la pyndep ïa ka jingïalehkai ha ka kyrdan kaba sha trai duh na ka miej kheiñ poiñ ha ka lympung ïalehkai OC Blue Shillong Premier League (SPL) 2021-22 katba ka Nangkiew Irat ka dang neh ha katei ka kyrdan ïalehkai Super Division hadien ba ka la pyndep ha ka kyrdan ba hynñiew.
Kitei ki ar tylli ki team ki la mih madan khadduh ha ka sngi Balang ha ka jingïalehkai ha madan MFA Third Ground, Polo, Shillong ha kaba ki la ïakhaid da kaba thep mar 2 kol.
Ka Mawkhar SC ka la pyndep ka jingïalehkai mynta ka samoi da kaba khur 7 poiñ ha kaba ka la mad nam rem 9 sien, ïakhaid 4 sien bad jop tang shisien na ki 14 sien ïalehkai katba ka Nangkiew Irat SC ka la pyndep da kaba khur 17 poiñ bad na ki 14 sien ïalehkai ka jop 4 sien, ïakhaid 5 sien bad rem 5 sien.
Watla ka Mawkhar SC ka dang ïoh ban mih madan nyngkong ha katei ka kyrdan ïalehkai hynrei kam ka la lah pat ban ïalehkai bha ha ka jingïatynjuh bor bad kiwei pat ki club kiba la ju mih madan bunsien ha katei ka kyrdan, kum ïa ka Shillong Lajong FC, Rangdajied United FC, Langsning FC bad ka Nangkiew Irat SC.
Haba phai sha ka jingïalehkai kaba long hynne ka sngi Balang, ka Nangkiew Irat tang ha ka jingïalehkai ba dang ïaid 5 minit ka la ïoh ba plie pyrda nyngkong lyngba ka kol ba la thep da u Lambor Nongsiej bad ka minit ba 30 jong ka jingïalehkai u Overkindness Lyngdoh u la thep ïa ka kol kaba ar na bynta ka Nangkiew Irat SC ha kaba haduh ba kut ka kylla step ka la lamkhmat da 2-0 kol.
Haba wanphai sha ka jingïalehkai jong ka kylla miet, watla ka lad na bynta jong ka ban dang neh ha kyrdan ïalehkai super division ka la kut ha ka samoi ban wan, hynrei ki rangïalehkai ka Mawkhar SC ki khlem la kynran dien bad ïakhun tyngeh beit triang.
Kumta da katei ka mynsiem ïalehkai ha ka minit ba 62 ka la ïoh ban pynphai kol lyngba u Aibiang Nongneng. Da katei ka shi kol ba la pynphai da ka Mawkhar SC ka jingïalehkai ka la nang ïathnem ba baroh arliang. Ha ki minit ba dang sah bun tylli ki kabu baroh arliang ki la pynlehnoh ei.
Hapdeng ka jingïalehkai kaba la kut lad ïa ka Mawkhar ban pynphai kol, hynrei shwa kut ka jingïalehkai kata ha ka minit ba 90+2 u Roland Kharsyntiew u la thep ïa ka kol pynïakhaid kaba la pynshaïong hi ngaiñ ïa ka Nangkiew Irat kaba la buh ka thong ban pyndep ïa kane ka samoi da ka nam jop.
Ïa ka jingïalehkai OC Blue SPL 2021-22 yn pynïalehkai pat ha ka 26 tarik Nailur 2022 ha kaba ka Rangdajied United FC kan ïakhun pyrshah ïa ka Ryntih SC. Ka Rangdajied United FC ka don ha ka kyrdan kaba lai da kaba khur 25 poiñ katba ka Ryntih SC ha ka kyrdan ba san da 17 poiñ.
Ka Rangdajied kan hap ban ïakhun tyngeh ban knieh kyrdan ba ar bad ka Langsning FC kaba dang sah sa shisien ïalehkai ha kaba kitei ki ar tylli ki team ki kamai mar 25 poiñ, katba ka Ryntih kan hap ban ïakhun tyngeh ban knieh kyrdan ba saw na ka Shillong Lajong FC (17 poiñ) kaba la dep lut baroh ki jingïalehkai.
Ka Malki kadei kawei pat ka team kaba la hiar sha ka kyrdan first division.
