Nongstoiñ, Naitung, 10: Ka jingpynmih biskot mynta u snem ka duna haduh bha haba ïanujor bad ki snem ba la dep, namar ki shnong kiba pynmih biskot bha naduh Nongkasen, Markasa, Mawkaton, Laitkseh, Marngor, Phyllut, Mawlaisyiem, Nongshilong, Parïong bad kiwei kiwei ki shnong, haba ïakren bad u nongthoh khubor ki la ong ba ha kiwei kiwei ki snem naduh ka taïew ba nyngkong u Naitung man la ki steshon kum ha Laitkseh, Marngor, Mawbrimynni, Markasa bad kiwei kiwei, ki kali Mahindra pickup ki ieng laiñ man la ka sngi ban thep biskot na ka bynta ban leit die shaduh Assam, hynrei mynta u snem ki kali ki kiba wan kit biskot duna bha.
Nalor kata ki la ong ruh ba wat u jyntang ruh mynta u snem um da san bha. Haba kylli pat halor ka ïew biskot, ki la ong ba ha ki taiew ba dang sdang pynmih ka dor ka poi haduh laiphewsan haduh sawphew tyngka shi kilo, hynrei ha kine ki sngi ka la sdang hiar bad ka dang poi kumba ar phewlai haduh ar phew san tyngka shi kilo.
Ha kaba ïadei bad ka jingpynïaid ïew ïa u biskot ki nongrep, ki la ong ruh ha u snem ba la dep u Bah Banteidor Lyngdoh Myntri ka rep ka riang, u la dep kular ba un sa ïarap ban thaw ki lad ki lynti ban pynïaid ïew ïa u biskot sha Bangladesh. Hynrei haduh mynta ym pat don satia ki nongrep kiba ïoh lad ban leit kit biskot sha Bangladesh, hynrei ki ju leit pynhap tang ha Assam bad hapoh ka jylla.
Nalor kata ki la ong ruh ba ha ki snem ba la dep ba ka jingpynmih biskot ka jur bha, ki don ki trok heh kiba wan kit naduh Nongkasen ban pynpoi haduh West Bengal bad kiwei kiwei ki jylla. Don ruh napdeng ki nongrep kiba ong ba lada long kum mynta u snem, ka jinglut ha kaba shna ïa ki rynsan ka bun hynrei ka jingmih ka duna, tangba lada ka dor ka neh kumba ka long mynta haduh u bnai Nailur, ki dang don ka jingkyrmen bad ki lah ban dang ïohnong.
