Nongstoiñ, Nailar, 20 : Ka District Legal Services Authority mynta ka sngi ka la pynlong ïa ka Legal Awareness Programme halor ka NALSA Child Friendly Legal Services for Children Scheme 2024 ha ka shnong Nongtraw West Khasi Hills. Ka jingpynlong jong ka DLSA ïa kane ka prokram ka long ban pynsngewthuh halor ki kam kiba ïadei bad ki aiñ ïada kiba u paitbah u dei ban tip.
Ha kane ka sngi la wan ban pynsngewthuh paidbah da u Bah D.D. Diengdoh ALADC, u ba la ai jingkren halor ki skhim kiba pher kiba dei jong ka NALSA Child Friendly Legal Services for Children Scheme 2024 bad ka Juvenile Justice Act 2015. Katba ka Kong L.Nongrem, ALADC, ka la ai jingkren halor ka POCSO Act 2012, katba I nongmihkhmat na ka ophis District Child Protection Officer I la wan ban pynshai ban kren halor ki mat kiba ïadei bad ka jingïada bad ka bha ka miat jong ki khynnah.
Ha kane ka prokram la don ruh ka jingïakren bad ki nongïashim bynta, kaba la ailad ïa ki nongshong shnong bad ki khynnah skul, ban ïa pashat jingmut halor ka jingsngewthuh jong ki shaphang ka hok jong ki khynnah, ki lad jingïada katkum ka aiñ bad kiwei pat ki kyndon aiñ kiba pyrkhing ïa ki khynnah ban shongkha khynnah lada kim pat dei por.
Ha kane ka sngi la ïadon lang ruh da u rangbah Shnong ka shnong Nongtraw, ki nongshong shnong bad ki khynnah skul kiba don ha ka Shnong Nongtraw.
